Nongpoh, Nailar 30: Uwei u samla naka shnong Pahamsohthri ha Ri-bhoi u la ioh ban pynlait im ïa uwei u khun khla thapsim u ba la wan ban rung ha kamra thiah jong u haka janmiet jong ka 28 tarik mynta u bnai.
Katkum ka jingïathuh utei u samla bala tip kyrteng kum u samla Freddy Shabong u la ïathuh ba utei u khla u la wan rung ha kamra thiah jong u, bad hadien ba iohi ïa utei u khla utei u samla u la kem bad ai bam ïa u, namar hapdeng ka jingtieng utei u khun khla u la pyrshang ban phet na katei ka jaka.
Hadien shi sngi ba utei u samla u la ioh ban kem bad pynlait im ïa utei u khla utei u samla mynta ka sngi u la leit ban aiti noh sha ka tnad Wildlife ha Nongpoh ban kin ioh ban peit bad sumar bad ban pynlait im ïa u.
Shuh shuh utei u samla u la ïathuh ruh ba kane kam dei ka sien ba nyngkong ba u la ioh ban pynlait im ïa ki mrad namar ha ki snem ba la leit utei u samla u la ioh ruh ban pynlait im ïa uwei u khlieng bad ïa utei u khlieng ruh u la leit ban aiti sha ka tnad Wildlife ban leh ïa kaba donkam.
Na ka liang u samla Freddy Shabong kum uwei naki riew ieid mrad u la kyntu ruh ïaki para samla ba kim dei ban dusmon bad pynïap kulmar ïaki mrad kumba bun naki mrad kila sdang ban duhjait hynrei ban pynneh pynsah ïa ki.
