Ym don ka roi ka par ha West Bengal hynrei tang ka bamsap bad ka shongsyier, husiar na ka TMC: BJP

Shillong, K’lyngkot 19: U President ka BJP Meghalaya u Ernest Mawrie u la kynnoh ba ka jylla kaba ka TMC ka la synshar kam don satia kano kano ka roi ka par hynrei ka bamsap bad ka jingthut ka shong suk shong saiñ ka kiew bha ha West Bengal (WB) bad ka la maham ba ïoh kane kan wan jia ha ka jylla Meghalaya lada ki paidbah ki ngop ha ka buit phon ka BJP.
“Ha West Bengal ba ka TMC ka la synshar la bun snem phin leit hi shathie phin ïohi ba ym don ka roi ka pa hynrei kaba kiew ha WB ka dei tang ka kam bamsap bad ka jingthut ka shong suk shong saiñ, namarkata, ki paidbah ka jylla ki dei ban husiar ïa ka buit jong ka TMC,” u la ong.
Haba ïadei bad ka jingkam ka Mamata Banerjee ba dei tang ka TMC kaba lah ban kyntiew ïa ka jylla, u Bah Ernest Mawrie u la ong ba, “kaei kaba ka la leh pat ha West Bengal ka long mar khongpong phi pyrkhat kan leh phylla aiu ha ka jylla. Kata ka We Card bad MYE Card kaba ka kular hangne ka dei tang ka buit phon suda,” u la ong.
U la ruh ba lada ki paidbah ki kwah shisha ïa ka roi ka par dei tang ka BJP kaba lah ban wanrah ïa ka roi ka par namar dei ka BJP kaba synshar ha Delhi kaba mut ka roi ka par kan shu tuid beit sha ka jylla.
“Lada phi kwah ïa ka roi ka kiew, ka ïohkam ïohjam,, ka shong suk shong saiñ kynmaw ba dei tang ka BJP ba lah ban pynurlong wat ngop shuh ha ka UDP, ka Congress bad ka NPP namar phi la mad bad phi la ïohi ba ki la pheil bad dei tang ka BJP kaba lah ban pynurlong ïa kaba phi thrang.” u la ong.