Shen yn ai subsidy ka Sorkar Pdeng ïa ka dawai sboh

0

Shillong, K’lyngkot 19: U State President jong ka BJP u Bah Ernest Mawrie ha ka sngi Palei u la ïathuh ba shen ka Sorkar Pdeng kan sa pyntreikam ïa ka jingai subsidy ne duna dor ïa ki dawai sboh.
“Ha u Naiwieng jong u snem baladep, ka Sorkar ka ladep khot ïa ki karkhana kiba pynmih ïa ka dawai sboh bad sa shisien ngin sa sdang ban ai ïa ka dor kaba jem halor ka dawai sbh bad kane kan sa pynïohnong bha ïa ki nongrep,” la ïathuh u Bah Mawrie ha ka jingïakren bad ki lad pathai khubor.
Haba kylli, u Bah Mawrie u la ong ba ka rukom rep tynrai ka don hynrei ha Meghalaya ym pat ithuh satia kum ka jylla kaba la rep khlem da pyndonkam dawai sboh.
“Namarba ka jingdawa ka jur bha na ki nongrep ym tang na kane ka jylla jong ngi hynrei na ka ri baroh kawei, na kane ka daw u Myntri Rangbahduh ka ri u la shimkhïa ban khot jingïalang kynhun Myntri bad ban shim ïa ka rai ha kaba yn sa pyntreikam biang ban ai ïa ka dor kaba jem na ka bynta ka dawai sboh,” u la ong.
U Bah Mawrie u la ong ba u dap da ka jingsngewkhia ïa ka Sorkar Jylla kaba la shu bat kai ïa ki hajar tylli ki aplikeshon. “Bun sien ngi hap ban kyrpad ïa ki ba kin ai jingmynjur ïa ki kyrteng jong ki nongrep namarba ka pisa ka dei kaba wan na ka sorkar pdeng. Ngi la ïakynduh jingeh bad ngi hap ban ïakren ïa kane ka kam bad u Myntri ka Rep ka Riang,” u la bynrap.

Leave A Reply

Your email address will not be published.