Kyntu ka ‘Sur U Paidbah Ka Bri Hynñiewtrep’ ban ïarap pynïoh EPIC ïa ki nongshong shnong ha khappud
Jowai, K’lyngkot 19 : Ka Sur u Paidbah Ka Bri u Hynñiewtrep hynin ka sngi kala leit ban buh da ka jingthoh ha ka ophis u Deputy Commissioner ka West Jaiñtia Hills District bad kyrpad ban pynrung kyrteng EPIC noh ïa kito ki nongshong shnong ha khappud kiba la dep leh da ka online application namar haduh mynta ka Election Commission kam pat lah ban pynbeit ïa kane ka kam.
U Chairman jong ka Sur U Paidbah Ka Bri Hynñiewtrep, u bah L.S. Thabah haba ai jingkren hadien ba la aiti ïa ka jingkyrpad na ka ophis u DC WJHD ban pynthikna ïa ka Enrollment Election Photo Identity Card ïa ki briew kiba la dep ban apply online, u la ong ba kane ka dei ka por ba biang tam ïa ki sengbhalang bapher bapher ban wan rah ïa kitei ki briew Khasi Pnar kiba don sha jylla Assam shapoh ka jylla la jong.
Kaba nyngkong u la ong kaba donkam eh ka long ka EPIC bad hadien kane dei ban bud dien sa ïa ki kam pynroi ha ki shong Khapppud ong u ma Thabah.
Ula ong ha ka jingïadei bad ka jingjia ha Mukroh ki nongïalam ka jylla kim nud ang ei ei ha khmat ki nongïalam jong ka Assam ne ban leh ei ei, ha kaba na ka liang ka Assam ka dang wan ban pynjot ïa ki lynti leit bri jong ki nongshong shnong ha khappud.
Shuh shuh ula ong ba ki briew jong ngi kiba sah ha ki thain khappud kim shem la ïoh kino kino ki kam pynroi na ka jylla Meghalaya kumjuh ruh na ka jylla Assam kine ki jingeh ki dei tang na ka daw bym don Epic, kumta na ka liang jong u bah Thabah u kyntu jur ïa ki bor District bad kumjuh ruh ïa ka sorkar ba kan pynbiang ïa kaei ba kitei ki briew ki donkam.
U Chairman HBDRF ma Chandame Sungoh haba kren ula pynpaw ka jingsngew pyrshah jur ïa ka jingleh dusmon ka briew jong ka Assam ban pynjot ïa ki lynti ki surok leit bri ne leit trei leit kta jong ki briew ka jylla, da kaba ki nong Assam ki la tih da ki thliew ha ki tei ki surok ki lynti.
Mynta ka sngi la don lang ruh u ma Pyrkhat Shylla Chairman Sur U Paidbah Ka Bri Hynñiewtrep West Jaiñtia Hills bad ka kong P. Phawa.