Ujor ki longïing pyrshah ïa u Waheh Shnong bad ka Vigilance Committee ka Lumtrep Nongjngi ba duh khaw rashon

Jowai, K’Lyngkot 19 : Ki phra tylli ki longïing naka shnong Lumtrep Nongjngi kila ujor sydon sha u Deputy Commissioner (Supply) ka West Jaiñtia Hills District mynta ka sngi pyrshah ïa u Waheh Shnong ryngkat ka Vigilance Committee kiba la leh donbor da kaba pynduh khaw ïa ki la kumba katto katne bnai bad don napdeng jong ki kiba la shah pynduh khaw baroh shisnem lynter kata naduh u 2022 tad haduh ka 18 tarik mynta u bnai.
Halor kane ka jinglehbor jong kitei ki nongïalam shnong kaba la kot la shisnem mynta, khnang ban lait naka jingïap thngan kila rai ban leit shim khaw rashon beit haka 18 tarik u Kyllalyngkot 2023, hynrei phewse kin shym la ïoh khaw satia wat tang ban rung shapoh ka kamra buh khaw ym shem la shah ïa ki.
La ïathuh ba u Waheh Shnong ryngkat ka Vigilance Committee kiba pynïaid ïa ka dealer rashon hapoh ka shnong da kaba die ïa u khaw ha ka dor 4 tyngka shi kilo kaba long pyrshah ïa ka dor bala buh da ka ophis jong u Deputy Commissioner Supply WJH kaba long 3 tyngka shi kilo.
Kitei ki nongpynïaid khaw rashon ka shnong kila byrngem lada kim shim ha ka dor 4 tyngka shi kilo kim nym ai khaw satia na shnong da kaba bthah ïa ki ban leit shim khaw na ka ophis u Deputy Commissioner Supply Jowai. La pynsngew ruh ba ki nongïalam shnong kila ot ruh mar shikilo na baroh ki card jong ki nongbam rashon.
Halor kane ka jingeh kitei ki longïing kiba duh khaw rashon kila leit ban ujor syndon sha ka ophis u DC khnang ban lait na ka jingshah thngan hapoh ka shnong bad ban lait ruh na ki jingjia ba sngewsih, kila buh ruh ka jingkyrpad na ki bor ba halor ban ïarap pynïoh ïa u khaw uba ki la duh ha kine ki bnai bala dep.
Na ka liang kitei ki longïing ba duh khaw na ka kur Nongkrem kila dep ruh ban ujor ïa kane ha ka 6.5.2022 bad kumjuh 15.2.2022.