Ym don jingthmu shuh ka sorkar pdeng ban khlong Uranium na Meghalaya : Pangniang

Shillong, Naitung 03 : Ki nongïalam ka HSPDP hynne ka sngi ki la leit ban kynduh ki heh jong ka Atomic Mineral Directorate (AMD) ban pan jingpynshai halor ka jingkhih biang ka ishu Uranium ha ka jylla.
“Mynta ka sngi markhmat ngi la kynduh ïa u Regional Director jong ka AMD, Dr. Prakhar Kumar ha ophis treikam jong ki kaba don ha Nongmynsong ban pan jingpynshai la ka sorkar India ka dang don neem ka jingthmu ban khlong ïa u Uranium na ka jylla jongngi. Ha ka jingïakren u la kren shai ba ka AMD ka long kum ka Ministry kaba peit ïa ka jingdon ki marpoh khyndew ha baroh kawei ka Ri hynrei kaba peit ïa ka kam khlong uranium dei ka UCIL. Hynrei u la ong ba ka sorkar India kam don shuh ha ki prokram jong ka ban ktah biang ïa u Uranium ha kane ka jaka,” ong u President ka HSPDP, Bah KP Pangniang haba kren bad ki lad pathai khubor.
Shuh shuh u ong ruh ba ka rai ba shim da ka sorkar u Dr. Mukul Sangma ha u Nailar 2016 ki la kren shai bad rai da ka Kynhun Myntri ba ki la weng noh ïa kato ka jingthmu khlong ïa utei u marpoh khyndew na Domïasiat kaba hap ha South West Khasi Hills District.
“Kumta, ngi na ka party ngi leit khnang ban kynduh namar ngi kwah ban shai kdar namar lada ki thmu ban tih kan ktah wat ïa ka shongsuk shongsaiñ khamtam ïa ki sengbhalang ki jongngi kiba phi ju ieng lang bad ngi ka party bad ruh na ka bynta ka Jaidbynriew bad ka Hima bad kumta ngi la dep ban pynpaw ba ngin ieng pyrshah,” la ïathuh shuh shuh u Bah Pangniang.
Halor kane, u ong ba ruh ba ki heh jong katei ka tnad ki la kular ba ka Meghalaya kam don shuh ha ka map jong ka jingkhlong ïa u mar Uranium.