Ym don jingthmu ka sorkar ban pynjlan ïa ka samoi treikam ka KHADC bad JHADC : Dy CM

Shillong, Nohprah 10 : Ka sorkar jylla kam don kano kano ka jingthmu ban pynjlan ïa ka samoi treikam jongka Khasi Hills Autonomous District Council (KHADC) bad Jaintia Hills Autonomous District Council (JHADC).
“ Kam don kano kano ruh ka jingtyrwa ban pynjlan ïa ka samoi treikam jong kine ki ar tylli ki District Council “ ong u Symbud Myntri Rangbah uba dei peit ïa ka tnad District Council Affairs u bah Prestone Tynsong.
U la ong ba ka sorkar kam lah satia ban shu pynjlan ïa ka samoi treikam jong ki khlem kino kino ki nongrim kiba biang.
U la ïathuh ïa ka samoi treikam jongka Garo Hills Autonomous District Council (GHADC) la pynjlan arsien na ka daw ka soskular kren ïasuk ka ANVC bad kawei pat namar ka khlam COVID.
Ka KHADC bad JHADC mynta ki la pynïaid shakhmat ban phiah ïa ki constituency ban pynïaryngkat ïa ki jingdon briew shwa ban long ka election MDC ha u snem ban wan.
Na ka liang u Chief Executive Member (CEM) ka KHADC ba dei ruh u MDC ka Sohryngkham, Bah Pynïaid Sing Syiem u la ong ba kum ka Executive Committee kam donbor satia ban pynlong kloi ne pynlong slem ïa ka elekshon ha District Council.
“Ka rai ban pynlong ïa ka elekshon ha ki District Council ka shong ha ka sorkar jylla bad ha u Lat. Hynrei ngi kum ki MDC ngi la long kiba la pynkhreh lada pynlong ha kano kano ka por,” ong u Bah Pynïaid haba kren bad ki lad pathai khubor.
Da kaba pynphai nia pat ïa kito kiba kynthoh ba ka jingthaw ïa ka Delimitation Committee kadei tang ka buit ban pynjlan ïa ka elekshon, u Bah Pynïaid u la ong, “Kito kiba ong ba kadei tang ka buit ban pynjngai elekshon kadei tang ka jingkren namar ba la jan elekshon. Ha kaba khatduh lada leh bha ruh shah kynthoh bad shah tan lang ha ka jingkynthoh politik.”
Shuh shuh u ong ruh ba ka jingthaw ïa ka Delimitation Committee ïa kaba la mynjur ruh da u Lat ka long ba ki ïohi ba don ki constituency kum ka Mawlai kiba ka jingbun ki nongthep vote ka la kot sha ka 55,000 ngut tam katba don ki constituency kiba rit kiba don tang kumba 12,000 ngut ki nongthep vote.
“Kane ka Delimitation Committee ka long ban pynïaryngkat ka jingbunbriew na kawei ka constituency sha kawei pat. Don ki shnong kiba khlem pep kin hap noh sha kawei pat ka constituency,” u la bynrap biang.
Katkum ka jingong jong u, ka Council man ka por ba ka bhah ïa ki kam pynroi sha ki constituency bapher bapher ka bhah beit mar kumjuh sha ki MDC. Kumta, u la ong ba lada kum ka Mawlai kaba kot palat 55,000 ngut tang ki nongthep vote ka ïoh kajuh ka bhah kumba ïoh kiwei pat ki constituency kiba rit ka jingduhnong kan dei ïa ki paidbah hi.
U CEM u la ong ruh ba lada jia ba treikam noh ïa ka 125th Constitutional Amendment hapoh Parliament, kin sa mih sa hynriew tylli ki constituency bad ïa kane ka kam ban pynkha constituency thymmai kam dei satia ka kam jong ka Executive Committee hynrei kadei ka kam jong ka Delimitation Committee.
La ïathuh ruh ba katkum ka jingbthah, katei ka Committee ka ïoh por haduh u Nohprah ban pynlong ïa ka jingkynduh ïa ki paidbah haman la ki constituency.
Kumban shu kdew hangne, dang ha ki 10 snem mynshwa, kata ha u 2013 ka la don teng ka jingbishar bniah ïa ka jingdon ki nongthep vote bad ha katei ka por la pynduh noh ïa ka Laitkroh constituency bad pynkha thymmai pat da ka Umsning Constituency.