Ym don jingtei ha dewlynnong Lumpongdeng dei tang ki ïingsher dara ong u CM

Shillong, Iaiong 15 : U Myntri Rangbah ka Jylla Conrad K Sangma ula pynthikna ba kan nym don ka jingïakren bad ka kynhun Green Tech Foundation (GTF) kiba ïakhih pyrshah ïa ka jingthmu ban tei ïa ka Taj Umiam Resort & Spa ha Umiam, haba pynpaw ba ki jingsngewkhia jong kane ka kynhun ka dei kaba la dep ban pynbeit bad pynshai.
“Ka jingpyntrei ïa ki jingtei kan long ha ka jaka ba ïeng ka Orchid Lake Resort ba mynta, bad ka sawdong sawkun bad ka mariang hapoh ka dewlynnong kan long beit kumba ju long kata yn ym don jingtei hynrei tang ki iing sher dara” ong u Conrad.
Ula ban jur ba yn ym shah satia ban don kano kano ka jingtei kaba neh shirta hapoh ka dewlynnong, lait noh tang kiba shipor, ki jingtei ki bym pynjot ïa ka mariang ki ban shna tang na ka bynta ki katto katto ki jingïalang ba kyrpang.
U Myntri Rangbah ula pynpaw ïa ka jingsngewsih ba ka GTF kam pat hun satia ïa ka jingkular jong ka Sorkar bad ong “Ka long kaba sngewsih ba kim pat sngewhun namar kane ka dei ka jingshisha halor kane ka kam”.
Haba kylli la ka Sorkar kan khot ïa ka GTF sha ka jingiakren, u Myntri Rangbah ula ong “Ka jingsngewkhia jong ki ka long ba ka jingtei ïa ka hotel kan long ha ka dewlynnong “Nga la kren shai ba kam don satia kaba kum kane ka jingthmu, kan ym don satia kano kano ka jingtei ban tei ha katei ka jaka, ka dewlynnong hi kan ïai long kumba ka ju long, kane ka kam ka la shai kdar, ngam ïohi ïa kano kano ka jingkulmar jingmut ha kane ka bynta”.
Halor ka jingkynnoh ba pom dieng, u Conrad ula ong ba kane ka dei ka kam jong ki riew shimet, haba pynpaw ba ka kompani kaba don bynta bad ka project, kam donkti satia ïa kane ka kam.
“Ki Pulit kila dep pynshai ba ki don ki riew shimet kiba donkti, ka kompani kam don bynta eiei ruh em bad ka project” ula ong haba kyntu ïa ki nongshong shnong ba kan nym don satia ka jingpynjot ïa ka dewlynnong.
Ula kyntu ïa ki nongïakhih ba kin ïatreilang haba pynpaw ba ka project hi ka thmu ban kyntiew ïa ki kam jngohkai hapoh ka Jylla.
Ka GTF ka la don hapdeng ka jingshah thngan ba khlem pud naduh ka 8 tarik Iaiong, haba dawa ban pynsangeh noh ïa ka project namar ka jingsngewkhia ïa ka jingjot ka mariang.
U Chairman ka Foundation H Bansiewdor Nonglang ula pyntip ban bteng beit ïa ka jingiakhih tad haduh ba ka Sorkar kala ai ia ka jingkular da ka jingthoh ba ïa kane ka project la pynduh pyndam noh.
U bah Nonglang u la rai ban bteng ïa ka jingshah thngan hadien ba ka jingïakynduh bad ïakren bad ka Director ka Kong BL Pakyntein kam long kaba seisoh satia namar.
Mynta ka dei ka Sngi kaba hynniew ba u la bteng a ka jingshah thngan ba khlem buh por bad u la sdang ban kem tlot ïathuh u General Secretary u Ritre Lyngdoh.
U la ïathuh ruh ba ka tnad kam jngohkai ka ïeng skhem ha ka nongrim ban pynïaid beit shakhmat ïa ka projek bad na kata ka daw ka GTF ruh ka rai ban bteng beit ïa ka jinshah thngan.