Shillong, Jymmang 26 : U President ka United Democratic Party (UDP), u Bah Metbah Lyngdoh u la ong ba kam long satia kaba lah ban long ba u MLA ka Mawkyrwat u Bah Renikton Lyngdoh Tongkhar un leit ban pynïasoh sha ka National People’s Party da kaba pynskhem ba kam don kano kano ka dak ba une u nongthaw ain un mih noh na ka party.
Kine ki khubor leit pynïasoh NPP jong u MLA ka Mawkyrwat ki la phriang hadien ba dang shen da ki spah spah ngut ki nongkyrshan ka UDP ki la phet noh na ka party ban leit pynïasoh sha ka NPP.
“Ki nongkyrshan ki laitluid ban leit na kawei ka party sha kawei pat, na ka A sha ka B sha ka C. Hynrei ki Nongmihkhmat kiba shah jied kim laitluid ban leh ïa kata, ki shah teh ha ka ain bad ki hap ban leh katkum kata”, Ong u President ka Party haba kren sha ki nongthoh khubor.
Shuh shuh u la ong, “Kumba ka long mynta kam don eiei kaba pynpaw ba u Renikton u mih noh na ka party.”
Nalorkata, u Bah Metbah u la ïathuh ba na ka por sha ka por u ju kynduh ïa u Bah Renik. “Nga ju ïakynduh ïa u man ka por bad u la kren shai ba un ym mih noh na ka party kumba long mynta.”
Halor ka jingphet seng jong ki nongkyrshan, u la ong ba ka UDP ka la bthah ïa ka unit ba dei peit ban bishar bniah ïa ka jinglong jingman.
“Ha ka UDP ngi ngeit skhem ba ki nongtrei kiba ha tynrai ki dei kiba kongsan tam.Ngi dei ban kren bha bad ki shwa ban shim ïa kano kano ka rai”, u la ong.
“Ngi la bthah ïa ki nongïalam jongngi ha Mawkyrwat ba kin peit bniah ïa kane ka kam bad ban ai jingtip lada ki donkam ïa kano kano ka jingkyrshan na ka party.”
