Shillong, Jymmang 23: U Company Commander jong ka kynhun shipai 160th Battalion ki BSF ba dei peit ïa ka BOP Lokaichar, ha South West Garo Hills district kila ujor sha ki pulit ba mynsaw u ASI u Raj Mohan ha ka jingshah tied ha ki paidbah.
Katkum ka jingujor jong ki shipai BSF la ong ba ha ka 19/Jymmang/2026 ha ka por kumba 8.05 baje mynmiet ki shipai BSF kila ïoh ïa ka jingtip ba don ka jingïakhaïi beaiñ kumta kila leit ban khynra ïa ka khlaw kaba don ha jan shnong Gilajuripara.
Katba ki BSF ki dang sdang ïa ka jingkhynra kila don ki riew paidbah kiba ktah kti ïa ki shipai BSF bad ha kane ka jingjia kila tied ïa ki shipai ha kaba u wei u ASI ba la tip kyrteng kum u Raj Mohan u la mynsaw bad ki BSF kila ithuh ïa u wei na kiba don kti ba la tip kyrteng kum u Saalsing na ka shnong Meranggipara.
