-Bah F. Kharkongor
Shillong, Jymmang 23: Ka sorkar jylla lyngba ka tnat kaba dei peit ka la pynlong ïa ka prokram ka put ka tem ha ka State Convention Hall ha Shillong kum ka dak jong ka jingdap 90 snem ka jingai jingshakri ka Akashvani kum ka nongai jingtip jong ka ri.
ïa kane ka prokram la pynlong da ka Akashvani Shillong bad Akashvani North Eastern Services (NES), ha kaba la don ki sur jingrwai na ki nongput nongtem bad ruh ki kynhun nongtem ba pawnam jong ka Meghalaya.
Ki la don ki jingrwai Khasi tynrai da Balah pynhun Mawlong & party, ki jingrwai Garo da Ahowee folk band bad ki jingrwai Jaiñtia da Seinraij Art & Culture Group. Ki la don ruh ki jingrwai pyrthei da i kong Shirley Passah bad ki jingrwai Hindi da I kong Ribhakupar Shadap, iba la jop ïa ka thup Modern Folk jong ka NE Body can Sing ha u snem 2016, kaba long ka prokram ban wad ïa ki briew ba don sap ha ka put ka tem ha ka thaiñ shatei lammihngi ba la pynlong da ki Akashvani station.
Ha ka jingai jingkren, u kongsan, Principal Secretary, Sorkar Meghalaya, Frederick Roy Kharkongor, u la kdew sha ka bynta jong ka Akashvani.
“Kane ka long kum u mawmer uba kongsan. Ka Akashvani ka don ha palat 90% jong ka India. Wat hapdeng ki lad kiba bun kiba ngi don ha ka broadcast, print bad electronic media bad ka online media, ka jingshaniah ka kham bun ha ki khubor na ka Akashvani namar ki ai ïa ka khubor kaba shai bad kaba lah ban shaniah,” u la ong.
Ha kaba kren shaphang ka Mann Ki Baat, u la ong, “u Myntri Rangbahduh, Narendra Modi u ïakren bad ki nongshong shnong shaphang ki kam bapher bapher. La bun ki bynta shaphang ka Meghalaya kiba la mih ha kine ki jingkren jong u Myntri Rangbahduh. Kumta haba ngi kren shaphang ka sur, ka jingpaw bad ka jingkongsan, nga tharai ba ka Akashvani ka don ha khlieh duh.” U la ai jingïaroh ïa ka Akashvani bad ka Doordarshan kiba la pynbiang ïa ka rynsan na ka bynta ki briew ba don sap kiba dang sdang pawnam. “Ka la ai ka lad ïa ki ban poi sha ki ïing ha kylleng ka jylla bad sha kiwei kiwei ki ri ruh,” u la ong.
“Katba phi rakhe ïa kane ka jingdap 90 snem, sngewbha bteng ban leh ïa kane ka kam kaba bha kum ka paralok bad ka sur jong ka ri, bad bteng ban wanrah ïa ka jingbha, ka jingpaw bad ka sur ïa ki riew don sap, ïa ka kam pathai khubor bad ruh ïa ka pyrthei baroh kawei,” u la ong.
U Assistant Director, Engineering, Akashvani Shillong, Antony War u la ai jingkren ha kaba u la pdiang sngewbha ïa baroh kiba wan ïashim bynta ha kane ka prokram. Ka Assistant Director, Programme, Akashvani NES Shillong, Evelyn Khongsitka la ai ka jingkren ai jingsngewnguh.
Ha kane ka prokram, ka la don ka jingpyni ïa ka kolshor, kaba la wanrah ruh ïa ki sur jingrwai bapher bapher. Ha ryngkat u Principal Secretary, Sorkar Meghalaya, Frederick Roy Kharkongor, la wan ïashim bynta lang u Zonal Director, Indian Council of Cultural Relations, Northeast Zone, Dr.Munish Singh, bad u S.K Deohare, DDG Admin, ADG Office, Admin & Broadcast Operations, North East Zone (NEZ) ha ryngkat kiwei kiwei ki kynrem ki lyndan.