Shillong, Jylliew 23: Hadien ba la mih ki jingkynnoh da mano re mano halor ka jingdkoh ka jingpyntreikam ïa ka skhim JJM na ka liang Tnat Public Health Engineering (PHE) ka la pynshai ba kam shym la don satia kano kano ka jingduna ne jingleh bakla (Irregularity) ha ka jingpyntreikam ïa ka Jal Jeevan Mission (JJM) ha Ri-lum Garo kumba la kynnoh da mano re mano.
Ha ka kyrwoh khubor, u Additional Chief Engineer ka PHE ula ong, “Ngi la lah ban leh bha ha ka ban pynbiang ïa ka umbam umdih ha ki shnong kiba don ha ki thaiñ nongkyndong ka Rilum Garo. Hynrei katei ka projek ka dang ïaid shakhmat bad ngi dang ïaleh ban pynbeit ïa ki jingeh kaba ngi la mad ha ka jingpyntreikam. Kila don ki jingeh kiba la mih na ka jingpyrshah ha kaba ïadei bad ki tyllong um, ka jingshim ïa ki jaka bad kiwei kiwei, hynrei ngi dang ïaleh ban pynbeit noh ïa kine lyngba ki Engineer kiba peit ïa ka kam”.
Ka PHE ka la pyntip ba ka jingslem ha ki katto katne ki projek ka dei eh namar ka jingmih ki jyrwit jyrwat kum ka jinglong ka suiñbneng bad kiwei kiwei ki daw, ïa kaba la lah ai por shuh shuh ïa ki kontraktor da kaba buh hakhmat ba ym dei ban don kano kano ka shnong ka ban shah iehnoh ha ka jingpyndep ïa ka JJM.
“Kumta ngi kyntu ïa ki nongshong shnong ba kim dei ban sheptieng ba ki kontraktor ki lah ban iehnoh ïa kitei ki projek,” ong ka kyrwoh na ka tnat PHE.
“Ka la don ka jingbym shai ha ki paidbah bad ka rukom sam ïa ki jingtip ha kaba ïadei bad ka jinglong jingman jong ka JJM Scheme, kaba la lam sha ka jingmutdur bad kynnoh ka bym don jingmut,” la bynrap u Additional CE ha kaba ula pynthikna ruh ba watla ki mad ïa kitei ki jingeh bad jingtynjuh hynrei ki ophisar kiba la trei khlem shongthait kin pynthikna ba ka jingpyntreikam ïa katei ka skhim kan long kaba jop”.
