Shillong, Jylliew 17: Ka Hynñiewtrep Integrated Territorial Organization (HITO) Students’ Wing ka la pynrem ïa ka jingdawa ki bar jylla kiba kynthup ïa ki Bihari, Nepali, bad kiwei ïa ka jylla na ka bynta ka bhah kam bad ha ki kam pule. “Ngi kwah ban pynkynmaw ïa baroh ba ka Hynñiewtrep ka khlem dawa ïa ki reservation ha jylla Bihar, Darjeeling, West Bengal, bad Uttar Pradesh ïa ki shnong bad ki jylla jong ki jaitbynriew ba la kdew. Lada ki kwah ïa ka reservation, ki dei ban leh ïa kane sha ka shnong la jong. Kim dei ban jam ïa u pud u sam jong ki da kaba pyrshang ban dawa kum kine ki reservation ha kiwei ki jaka jong kiwei ki jaitbynriew,” ong ka HITO.
Ka la ong ba kum kine ki jingdawa kim don nongrim bad kidei ban kiar na kum kine ki jingdawa naba kim don hok hapoh u pud u sam ka jylla namar baroh kawei ka Khasi & Jaiñtia Hills Districts haduh mynta ka hab hapoh ka Khasi States Treaty ha kaba kine ki pud ki sam ki khlem ïasoi ïa ka Instrument of Merger hynrei ki la soi tang ïa ka conditional treaty of Accession kaba kyrpang.
“Ngi dawa ruh ba ka sorkar kam dei ban pynsngap ïa ki jingdawa jong ki ïoh ka mih ka jingïashrut kaba ym donkam. Namar kane kadaw ka don ka jingdawa kaba khlaiñ na ka bynta ka ILP watba ka Meghalaya ka hab hapoh ka sixth schedule. Ka dei ruh kaba hap ban pynkynmaw ba ka Meghalaya Transfer of Land Regulation Act 1971 ka khang ïa ki bar jylla ne non-tribal ba kin ïoh jaka ha Meghalaya,” ong ka HITO.
“Namar kata ka HITO ka ong ba ym dei ban shahïia kiwei ba kin tuklar ïa ki hok jong ngi bad kim dei ban pyrshang ban knieh ïa ka pliang ja jong ngi, dei ban pyrshah jur ïa kane. Kine ki jingdawa ki long kum ka jingai ding bad dei ban kiar. Kiwei ki non-Hynñiewtrep kim don ka hok ban dawa bad ban pyrkhat ïalade ban kam ki ‘Children of the Soil’ bad ba u pud u sam ka Hynñiewtrep ka dei ka homeland jong ki,” ka la ong.
Lah ban ong ba kijuh ki kynhun kiba wanrah jingkulmar hapoh Langpih kumno ki dawa reservation ha ka jylla Meghalaya, bynrap ka HITO.
Kaba ar katkum ka khana kitei ki kynhun ki dei kiba mut ban knieh ïa ki hok ki trai ri trai muluk ba kyrteng ka Hynñiewtrep ha ki snem 1978, 1987 bad kumta ter ter.
Ha ka Hill State Movement, ym don na kitei ki kynhun kiba la ïakhun na ka bynta ban ïoh ïa ka jylla Meghalaya kumta ha kano ka hok ki dawa reservation mynta.
“Ngin ym lah ban shah kum kine ki jingai ding bad ki jingdawa ba la pynmih da kine ki kynhun bar jylla naba kim don hok ban pynmih ïa kine ki jingdawa hapoh u pud u sam ka jylla jong ngi. Kumba ka long ha ki ktien jong u Law Minister barim uba la pynbna ïa ka Land Transfer Act ha u snem 1978 u late Martin N Majaw u la ong, “Ngim sngewtynnad ïa ki briew kiba nabar ban sah hangne. Ngi ong ïa ki ban wan hangne ban ïaroh ïa ka suiñbneng kaba blue bad ki lum kiba jyrngam, bad nangta sa leit phai noh.”
