Wer u Lat ka Jylla ïa ki paidbah bad ki Samla ban ïashim bynta shitrhem ha ka elekshon

Shillong, K’lyngkot, 27: Ka Jylla Meghalaya ryngkat lang bad ka ri baroh kawei, ha ka sngi Palei ka la rakhe ïa ka Republic Day kaba 74 snem jong ka ri, ha kaba u Lat ka jylla u Brig. (Dr.) BD. Mishra (Retd.) uba la long kum u Kongsan u la pynher ïa ka lama lairong jong ka ri ha madan Polo, Shillong.
Haba kren kum u Kongsan, u Lat u la ong, “shen ka Jylla kan sa jied ïa ki nongmihkhmat sha ka ka Iingdorbar Thawaiñ. Nga kyntu ïa ki paidbah nongshong shnong ka jylla khamtam eh ïa ki samla ba kin mih shakhmat ban ïashim bynta ha ka elekshon da ka jingkhuid jingsuba bad ban pynneh ïa ka jingshong suk ha ka sngi thep vote.”
U la ong ruh ba ka jylla ka ïoh biang ïa ka shongsuk shongsaiñ hadien ba ka kynhun kieng atiar Hynñiewtrep National Liberation Council (HNLC) ka la phah ktien ban ïakren ïasuk hapoh ki kyndon jong ka riti synshar ka ri India. Ka jingïakren ka la sdang. Ha kaba ïadei bad kane, ngi ai khublei kyrpang ïa ka Sorkar India kaba la jingkyrshan ïa ngi.”
Ha kaba ïadei bad ka jingïapynbeit pud hapdeng ka Meghalaya bad ka Assam, u Lat u la ong, “ka sorkar jylla ka la wad ïa ki lad ki lynti ban ïapynbeit noh ïa u pud u sam uba thikna bad ka jylla Assam da ka jingïasoi ïa ka Dulir Ïasngewthuh Jingmut (MoU) hakhmat u Myntri ka tnat Kam Pohing u Amit Shah ban ïa pynbeit ïa ki 6 tylli napdeng ki 12 tylli ki jaka kiba don ha ka jingïakajia pud.”
Ha kane ka sngi u Lat ula shim ruh ïa ka Rashtriya Salute na ki kynhun kiba ïashim bynta ha ka jingïaid kyrdem kjat bad la pyniphuh ruh ïa kane ka jingrakhe da ka jingkilan met jong ka kynhun Commando kynthei ka Jylla bad ka jingpyni nam ïa ki Tabut kiba la pynkhreh da ki kyrpang da ki tnad treikam bapher bapher ka Sorkar Jylla..
U Lat u la sam ruh ïa ka khusnam Meghalaya Day Award 2023 sha ka kong Sweetymon Rynjah kaba la ïoh ïa ka Tirot Sing Award, ka Dr. Jennifer V. Basaïawmoit kaba la ïoh ïa ka Pa Togan N Sangma Award bad u Klingson D Marak u la ïoh ïa ka Kiang Nangbah Award.
La pynbna ruh ha kane ka sngi ïa ka kyrteng jong kiba la ïoh pdiang ïa ka President’s Home Guards & Civil Defence Medal kiba kynthup ïa u Home Sing Khongjoh, Havildar (HG); u Bipul Khongwir, Havildar (HG); u Ambrush A. Sangma, Havildar (HG) bad u Pynkhambor Harris Khongsngi Senior Staff Officer (CD)
Katba kiba ïoh pdiang ïa ka President’s Police Medal ki long u Prodenson Sangma, Havildar jong ka 1st MLP Bn, Mawiong bad ka Police Medal for Meritorious Service u Upendra Mothey, ABSI jong ka 2nd MLP Bn na Goeragre, u Kolan Swer, Havildar bad u Ram Bahadur Sonar, ABC/32, Tura.
Ki Pulit kiba ïoh ïa ka khusnam Chief Minister’s Police Medal-2022 ki kynthup ïa u Director General of Police (DGP) ka jylla u Dr. L R Bishnoi, u Vivek Syiem SP (City), ka Queenie A B Fancon, MPS, Asst. Commandant SF10; u Ravi K Sangma, North Garo Hills; u Marbin B Marak jong ka 5th MLP Bn, Samanda, East Garo Hills; u Wisonroy Nongtdu, UBI na East Jaiñtia Hills; U Simseng A. Sangma, UBI, In-Charge Special Operation Team/Anti Narcotic Task Force, East Khasi Hills; u Johnny Foster Thangkhiew, UBI, SB (HQ); u Samuel Wanniang Saiñ Syiem, UBSI, SB (HQ); ka Ibashisha Kharpran, WPSI West Jaiñtia Hills; u Nabin Chandra Barman, SBC, Special Branch; ka Rephika Mawlong, AB/WPC, Office of Superintendent of Police, East Khasi Hills; u Wanjop Pakynteiñ, C.OPR, MPRO HQ, Shillong; ka Ibanri Syngkli, WP.BNC, 6th MLP Bn, Umran bad u Siddarth Thapa, BNC, 1st MLP Bn.
Ha ka jingpyni ïa ki tabut la ïashim bynta da ka tnat AH & Veterinary, ka DCIC-East Khasi Hills, ka tnat Dairy Development, MSSDS, ka Office jong u Chief Electoral Officer, ka tnat Social Welfare, ka Meghalayan Age Limited, ka tnat Horticulture, ka tnat Fisheries, ka tnat Soil & Water Conservation, ka tnat Forest & Environment bad ka tnat District Basin Development Unit-East Khasi Hills.
Ka tnat Horticulture ka la ïoh rah ïa ka nam lahduh katba ka tnat AH & Veterinary ka la ïoh rah ïa ka kyrdan kaba ar bad ka DCIC-East Khasi Hills ka la ïoh rah ïa ka kyrdan kaba lai.