Por elekshon ki lynthem maw ïa ka NPP, ha ka khia ka shon pat ki rieh lut : Bah Prestone

Shillong, K’Lyngkot 27 : U National Vice President ka NPP, Bah Prestone Tynsong ba dei ruh u Symbud Myntri Rangbah ka jylla ha ka sngi Thohdieng u la ong ba ha kane ka por elekshon, ki juh ki briew kiba ju thiah lang bam lang ha ka sorkar, hynrei kidei ki juh kiba lynthem maw kylla pat ïa ka party NPP da kaba kynnoh, kynthoh laiphew jait mar ïa poi ka elekshon.
ïa kane u la kren ha ka jingïalang ïalap elekshon na bynta u kyrtong ka NPP na Mawkynrew, Bah Kansing Lyngshiang ha ka jingïalang jong ki paidbah nongkyrshan Jatah Area kaba long ha Jatah hi.
“Ha kane ka por elekshon lynthem maw ki briew ïa ka NPP, kiba ngi ïathiah lang kiba ngi ïa bam lang ki thad kylleng sawdong. Hynrei nga shu ong tang kawei, phi ki paralok ba la ïoh jingkyrkhu na u Conrad na u Bah Prestone, sngewbha don ka mynsiem sngewnguh, lada phim don, kynmaw phin babe kylla,” u la ong.
Shuh shuh u la kynnoh ruh ba ha ka eh, ha ka khia ka shon ba ka jylla ka kynduh, baroh ki ïarieh lut hynrei ma u bad u Myntri Rangbah ki ïeng rangbah triang, la ka long naduh ka por ba wan syllad ka khlam COVID, ka jingïakhih them metor, ka ishu pynbeit pud pynbeit sam bad kiwei kiwei.
U ong ba watla ki mad ïa ka jingshah byrngem, hynrei khlem salia ki tur shakhmat da kaba buh hakhmat ba lada ym leh ma ki yn ym don shuh kiban leh.
Ha kajuh ka por, u Bah Prestone u la ong ruh ba u pang ka mynsiem haba u ïohsngew ba u kyrtong ka NPP, Bah Kansing uba watla u dei tang u riew paidbah hynrei ha ka por ba don ka khlam COVID u la lah ban ai ïa ka jingïarap na ka bynta ki paidbah kiba la kynduh ïa ki jingeh kiba harukom ha katei ka thaiñ.
“Ngi burom ïa u Maheh Martle Mukhim na bynta ki 20 snem ba u la shakri, u Bah Pai (Banteidor Lyngdoh) ruh u biang tangba ngi donkam kiba kham biang namar ngi don ha ka party kaba kham khlaiñ,” bynrap shuh shuh u Bah Prestone.
Nalorkata, u ong ruh ba ka jingkawang ktieh jong ki kyrtong bapher bapher kynthup naduh u MLA ba mynta pyrshah ïa u kyrtong ka NPP kadei namar ki la tieng lut. U la ong ruh ba dei na katei ka daw ki la phah ïa ki paidbah ban leit thied dawai urea sha MECOFED, tang mar shisngi ba khap ribbon u Bah Kansing ha katei ka thaiñ.
“U Conrad bad u Bah Prestone shisien ba la kular ngi pyndep ym kum kiwei kiba buh mawnongrim thok, da wad ka file PHC jong ka Jongksha lap ba ym pat mang pisa katba u mawnongrim la shong. Bapli u Bah Kansing ot ribbon dawai urea 13tarik, 14tarik pat ki la kynnoh ba u thok.”
Shwa kane, u Bah Kansing u la ong ba ka jingjia ha Thynroit ka la ktah haduh katta ïa u kum u kyrtong bad ruh ïa ki khun bad ka ïing ka sem baroh kawei. “Ki ong ba nga thok ai dawai sboh hynrei nga kwah ban pynshai ba ka jingkhap ribbon kadei tang ka dak bad nga khlem ong ba kin leit thied noh la shai,” u la ong.
U la ong ruh ba ka jingshah kynthoh ka la ktah haduh katta katta ïa u bad ïa ki paidbah ba kyrshan ïa u namar ki la kynnoh ba u Bah Prestone ruh u ïalam bakla.
“Nga la shah thnum ha ki nongkyrshan namar ki kynnoh beit ba ym don dawai urea bad ba ym ïoh shiteng dor (subsidy). Hynrei mynin pat bad mynne shaid shaid la poi ka dawai urea. Kito kiba kynthoh ïanga dei ma ki mynta kiba paw thok,” la bynrap shuh shuh u Bah Kansing.
Utei u kyrtong u ong ruh ba mynta ki paidbah ki la kmen lut bad mynta ki la ïoh ïa katei ka dawai sboh kaba kiwei ki ong ba ym lah ban ïoh. “Hynnin ka sngi la poi ka dawai sboh peit ïoh don ba kam ei biang namar mynta baroh kawei ka jylla kin ïoh dawai urea ha ka dor ba mar shiteng.”
Ha katei ka jingïalang u la pynpaw ruh ka jingkmen ba lyngba ka jingïarap jong u Symbud Myntri Rangbah bad Myntri Rangbah ki la ïoh ban siang rong ïa ka surok Lad Kharang kaba la buh jingeh ïa kiba pang ba shitom bad kiba armet bad ruh na ka bynta ka skim FOCUS kaba bun ki longïing ki la ïoh jingmyntoi.