Kob ka BJP ban jop 35 ngut bad ban ïalam ïa ka sorkar ha Meghalaya

Shillong, K’lyngkot 27: Ka Bharatiya Janata Party (BJP) ha ka sngi Thohdieng ka la kob ba ha kane ka kynti kaba mynta kan sa ïoh ban ïalam hi ïa ka sorkar hadien ka elekshon kaban sa long ha u Rymphang.
Haba kren sha ki lad pathai khubor u State President ka BJP u Bah Ernest Mawrie u la ong ba kat kum ka jingtih bniah ka BJP kham ha ki por ba mynshuwa ka lap ba ki don haduh kumba 25 tylli ki constituency kiba ka don ka jingkyrmen hynrei kham hadien ba la tih bniah biang la lap ba ki don kumba 35 tylli ki constituency kiba ka don ka jingkyrmen ba ka party kan ïoh rah ïa ka jingjop.
“Kham mynshuwa ngi shem ba don 25 seat kaba ngi don jingkyrmen hynrei ynda la tih bniah kham hadien ki paidbah ki la sngew nohmon sha ka BJP bad kumba long mynta ngi don jingkyrmen na ki 35 seat bad ngi kyrmen ba ngin ïoh ïalam ma ngi ruh ïa ka sorkar ha ka jylla,” ong u Bah Ernest.
“Ngim ïakren eiei shuh mynta halor ka jingïatehlok bad lada kumno kumo ka dawa ka kam kum ka party ngin sa peit hadien ka elekshon ban ïakren bad kito ki party kiban treh ban bud ïa ka nongrim jong ngi ban ym aili ïa ka bamsap,” u la ong.
Haba ai ksai halor ka manifesto, u Bah Ernest u la ong ba ka jubanlak ban leit sha u paidbah kan dei beit halor ka roi ka pa.
“Ngim don ki jyntei jynshna kiba biang lada dei ha ka surok, ngim do satia ïa ka medical college, ki engineering college bad kawei kaba ki paidbah ki la mad jingkordit kadei halor ka dheng kali bad tang lada ki paidbah ka jylla kin ailad ïa ka sorkar ar enjin kata kaba synshar da kajuh ka party a Meghalaya bad Delhi ki kam pynroi kin shlei ha ka jylla kumba kiwei ki jylla marjan jong ngi ki la ïoh mad,” u la ong.
Haba jubab halor ka mat jong ka ILP u la ong ba kumba baroh 60 ngut ki MLA ki kyrshan ïa ka Resolution ha ïing dorbar bad mynta ka shong sa ha ka sorkar pdeng ban shim ïa kino kino ki sienjam.
Haba ïadei bad ki kyrtong kiba ka party kan ai tiket u la ong ba ka party ka la dep phah ïa ki kyrteng jong kiba pan tiket sha Delhi ba kan ïoh ban rai.
“Na ka liang jong ngi ka State Election Committee (SEC) ngi la dep phah ïa ki kyrteng bad la kumno kumno ha lane shuwa ka 2 tarik Rymphang ngin sa pynbna ïa ki kyrtong ban ïakhun na ka tiket ka party,” u la ong.
“Ïa ki constituency kiba don arngut ki kyrtong kiba pan tiket ngi phah ïa ka kyrteng sha ka Central Parliamentary Committee (CPC), ba kan shim rai ha ka jingïalang ban sa long ha ka 31 tarik Kyllalyngkot,” u la ong.
Haba kylli halor ka jingslem ka party ban pynbna ka kyrtong u la ong ba ka BJP ka don la ka jong ka rukom pynïaidkam kaba pher na kiwei pat i party.
Haba ïadei bad ki kyrtong kiba don dak sniew ne mokotduma ha ïing kashari u Bah Ernest u la ong ba ka party kam pat shym la ïoh jingtip kat haduh mynta ba kin don kiba kum kita.