Ka VPP kam kwah ban shu sei kyrtong madei mata khlem jingmut: Ardent

Nongstoiñ, K’lyngkot 27: Haba kren ha ka jingïalang ba nyngkong eh jong ka Voice of the People’s Party (VPP) ha Nongstoiñ, u Bah Ardent Miller Basaïawmoit u ba long ruh u President rangbah jong ka party, u la ong ba ka party hi ka angnud eh ban wanrah noh ïa ka jingkylla ha ka synshar khaddar jong ka Jylla, da ka lynti kaba khuid bad suba kaba mut ka jingsynshar kaba khlem bam sap ne noh shilliang shano shano ruh.
Haba ai jingkren ha ka jingïalang kaba la long ha Bishop Hall Nongstoiñ, u Bah Ardent u la ong ruh, “Kum ka party VPP ngim shym don kano ka jingthmu shim kabu ha kano kano ka kynrum kynram jong kano kano ka seng, hynrei kum ka party ngi don ïa ki nongrim kiba skhem bad ha ka jingshisha ngim shym pat kwah ban buh kyrtong ha ki jaka ba kham pajih na sor bad ngim kwah ban shu ai tiket madei mata khlem jingmut. Hynrei, hadien ka jingïasyllok bad u Bah Bobby, ngi sngewthuh ba une u rangbah u long u ba biang ban ieng ïaleh na ka party. Dei halor kane ka nongrim ngi la pdiang bad ailad ïa u”.
“Ka jingmih jong ka VPP kam dei ka jingmih kaba ngi mih ban pynmyntoi ïano ïano, hynrei ka jingmih jong ngi ka long ba ngim don shuh da kawei pat ka lad babn khyllie pat ïa kane ka ri baieid jong ngi lane ban pynshngaiñ pat ïa ka. Ka long kaba sngewsih ïa ka jingïaid lynti jong ka jaidbynriew bad jong ka jylla hi, namar ngi la shah shukor ha kita ki nongïalam saiñ pyrthei ha kine ki snem kiba bun”.
“Ngi sngew lehraiñ ban ïohi ha ki rynsan jong ki medïa ban ong ba ka Jylla jong ngi ka don sha trai duh ha ki liang baroh. Ngi la long ka Jylla ba duk tam ha ki thaiñ shatei lam mih ngi jong ka ri India. Lada ngi phai sha ka pule dangle ne ha ka liang ka koit ka khiah bad wat ha ka shong suk shong saiñ ruh, lane wat ha ki kam jngoh kai pyrthei ruh ngi don sha trai duh”.
Ha kaba ïa dei bad ka jingshah rem noh ha ka elekshon ha u snem 2018, u la ong, “Kaei kaba pynsngewsih palat ïa nga ka long hadien ka jingshah rem ïa ka elekshon, ka dei ka jingpynkheiñ jutang jong ki ar seng kata ka UDP bad HSPDP, kiba la ailad pynban ïa ka BJP na Assam ban wan thaw sorkar ha ka Jylla. Ngi la leit ha u 2018 ban ong sha ki paidbah ban ai lad ïa ka UDP bad HSPDP ban thaw sorkar ka bym don Congress lane BJP. Hynrei, ki leit ïasnoh pynban sha ka sorkar ba la ïalam da ka BJP. Haba nga ïohi ïa kane, ngam lah ban pdiang bad ngam banse ban rai da kaba ieng skhem halor ka nongrim ka jaidbynriew, da kaba nga la iehnoh noh kum u President”.
Ha ka jingïadei bad ka seng VPP u la ong, “Ha u snem 2021 nga la shim biang ïa ka rai ban ïaleh biang, hadien ba nga ïohi ïa ki nongkyrshan jong nga ba watla hapdeng ki jingeh kiba bun. Nga la mih na ka UDP bad nga la rung sha ka HSPDP, hynrei nga phet biang halor ka nongrim, namar nga dang lah ban phet na ka party ban ïa kaba nga phet na ka nongrim bad ki paidbah ruh ki kyrshan ïa ka VPP, namar ngi ieng halor ki nongrim ban ïada ïa la ka jaidbynriew la jong”.
“Kaei kaba ngi kwah na ka bynta ka Jylla ka long ba ha ki 40 lane 50 snem ki ban wan, kita ki long ban pynim pat, ban pynbha pat bad ban pynkylla dur. Kata ka dei ka thong jong ngi ban wanrah lada ki paidbah ki ailad ïa ka party ka jong ngi. Ngi don ïa ka nongrim jong ka synshar khaddar kaba khuid, kaba mut ka thma pyrshah ïa ka bam sap, namar khlem kata ngim lah ban kular ei ei ïa ki paidbah. Ngi la ïohi ïa ka jingbamsap kaba la jur naduh ka thungkam thung jam la ka long ha ki DSC ne wat MPSC”.
“Lada ngi phai sha kane ka sorkar MDA ba mynta, ngi la ïohi ba kam lah ban kyntiew da lei lei ïa kane ka jylla jong ngi. Kam lah ban kit ïa ka jingkhia jong ki paidbah namar kam don pisa, namar wat ban siew tulop ïa ki nonghikai donkam ban mih surok bad thiah surok. Ka pla tyngka ka thylli bad kam don ei ei ban ai ïa ngi, lait na kaba shu kam trai ïa ki skhim na Delhi. Ka kam jong kane ka sorkar, ka la long ban shu rah skong ïa ki MLA bad MDC jong ka da kaba pynkam jubor ba ka dei ka jingtrei shitom jong ki”.
“Ngi donkam ban ïaleh pyrshah ïa ka thma jong ka bamsap, namar lada ngim lah ban pynkhlaiñ ïa ka pla tyngka jong ka sorkar, da kaba shu ap beit na ka ram ngim poi shano shano. Ka dei ka kamram jong ngi ki paidbah bad lyngba ba ngi seng ïa ka VPP, ka jingmut hi ka long ban leit sha ki paidbah ka jaibynriew, ka long ba ka thong ba hakhmat eh ka long ka thma ïa ka bamsap”.
“Ngi don ïa ki jingeh ha kine ki sngi bad kita ki long ha ka pang ka shitom bad ka jingnang jingstad. Ha ki Hospital sorkar ym don ei ei, skul sorkar ruh ym don ei ei. Kane ka sorkar ka shu lap miet tang ban shu pynsyrwa kat ïa ka pisa paidbah, ka shu bunkam ban thung ïa ki kam chairman ban shu pynsyrwa kai ïa ka pisa paidbah khlem jingmut, hynrei kim don por ban peit ïa ka jingeh ki paidbah, la ka long ki nongrep bad kiba trei kam dewiong”.
“Ngi donkam ïa ki nongïalam kiba ïohi jngai ki ban pyrkhat ïa ka bha ka miat ki paidbah, la ka long ha ka koit ka khiah kiba bit ba biang, lane ki jaka pule na ka bynta ki khun samla jong ka jylla jong ngi. Ka thong ba ngi dei ban buh haba ngi leit sha kane ka elekshon ka long ban buh hakhmat ïa ka synshar kaba khuid bad ban wanrah pat ïa ki aiñ kiba ngi lah ban ïada dalade ïalade”.
“Ngi dei ban pyrkhat husiar bha, namar lada bakla mynta ha kane ka elekshon 2023, ki jingïakhih kiba bun kin sa nang mih kham palat ïa kaei kaba ngi la ju ïai ïakhih baroh shikatta. Lada ngim don ïa ki aiñ kiba khlaiñ kiba lah ban ïada ïa ngi, ngam tip kaei ka ban jia ïa ngi. San snem kita ki nongïalam ha ka sorkar kim don jingtip ïa u paidbah. Hynrei ar bnai lai bnai ki khih khohreh ban tur sha ki paidbah ban ai kita ki jingïarap. Sam sniang shwa ka elekshon haduh ba wat ki sniang ba ri la jong ruh ki ïap lang. Pyrkhat bha bad rai da ka lynti kaba dei na ka bynta ka lawei”, ong u Bah Ardent.
Na ka liang u bah Ardent u la pynskhem ruh ïa ki nongkitkam jong ka VPP Nongstoin hapoh ka jingïalam jong u bah Bobby Kharshandi kum u President. Katba na ka liang u Bah Kharshandi kum u kyrtong VPP na kane ka Constituency haba ai jingkren shikyntien arkyntien ha ka jingïalang, u la ong, “Kaei kaei baroh ka dei ka jingialam jong u Blei bad kaba donkam hi ka long lada ngi lah ngin pynkhuid noh ïa kata ka jingbamsap. Ka por ka la dei ba ngin don da ki nongmihkhmat kiba peit shwa ïa ka jaidbynriew shakhmat bad ka party VPP ka don ka jingkyrmen ba skhem na ka bynta ka jaidbynriew”.