Kiwei ki kyrtong ki ïaleh ban rem tang ar ngut kiba ïakhun ban jop: PN Syiem

Shillong, K’lyngkot 27: U Working President jong ka Meghalaya Pradesh Congress Committee (MPCC) u Bah Pynshngaiñlang N Syiem uba dei ruh u kyrtong ka Congress na Pynthorumkhrah u la ther tyngeh ïa ka jingmih kynsan ki kyrtong ban aireng ha kane ka elskhon ban sa long ha u Rymphang bad ong ba kine ki kyrtong kiba mih dang tang ha kine ki khyndiat por ki dei kiba mih lupa ban ïakhun ym ban jop hynrei ban rem ha ka elskhon namar don tang arngut ki kyrtong kiba ïakhun ha kane ka kynti ban jop a Pynthorumkhrah.
Haba ïakren sha ki lad pathai khubor ha ka sngi Thohdieng hadien ba la wai ka jingïalang pdiang sngewbha ïa u Bah Predecessor Rumnong u kyrtong jong ka NCP ba ïakhun ha u 2018 na Pynthorumkhrah, u Bah Philliby Lyngdoh u Joint Secretary barim ka BJP Pynthorumkhrah Mandal ryngkat ki paidbah nongkyrshan jong ki, u Bah PN Syiem u la ong bakat kum ka jingïohi jong u ba kane ka elskshon kaba mynta ka dei ka jingïakhun tang hapdeng arngut katba kiwei pat ki kyrtong ki dei kiba la mih ïakhun lupa ban rem.
“Lada phi peit mynta ha kine ki khyndiat sngi kiba la dep ka jingmih ki kyrtong ka long kum ki tit bad u paidbah lei ka Pynthorumkhrah lei u tip bha ïa kane ka jingmih kine ki kyrtong bad mano ba pynïakhun ïa ki namar ban ïakhun ïa kat ka elekshon MLA na Pynthorumkhrah ban mih tang shibnai arbnai shuwa ka elekshon kam long kaba suk bad kba ym lah hi ruh ban jop,” u la ong.
Haba kylli haduh katno u sngew skhem ban jop ha kane ka kynti kaba mynta u bah Pn Syiem u la jubab, “2 sien nga la jop kum u MLA bad 3 kum u MDC ki buit bad ki jnit ki jnat ka politik nga la tip lut bad lada ha u 2019 tang 40 sngi nga pynkhreh ïa ka elekshon MDC na Pynthorumkhrah bad nga jop ngam artatien eiei ha kane ka kynti kaba mynta,” u la ong.
Haba jubab halor ka jingrai jong u ban ïakhun noh na kane ka constituency, “Ha ka jingshisha naduh shuwa u 2028 nga la don jingthmu ban kynriah noh hynrei ki paidbah a Mawsynram kim shah bad ynda nga la rem nga ïakhun ha ka elekshon MDC na Mawkhar-Pynthorumkhrah bad nga jop te khelmpep kum u MDC ka Mawkhar Pynthorumkhrah ngan ïakhun beit na kane ka constitunecy ba nga jop kum u MDC,” u la jubab.
“Lada phi peit mynta ki shnong kibym hap ha Mawkhar- Pynthorumkhrah MDC constituency hynrei ki ïing bad ki ophis shnong kiba ym ju don mynno mynno kum ha Nongmensong da ka jingïarap wad skhim nga la lah ban pynurlsong ïa kaba kiwei ki nongmihkhmat kim lah,” u la bynrap.
Haba kylli ïa kaei ka jingïohi jong u ïa ka jingsahdien ka constituency, “Ha Pynthorumkhrah ym don kawei ruh ka kolej, ki surok kim biang, ki lynti ïaid kjat kim biang, ki ïing shnong ne ohis kim don bad kiba bun bah ki jingduna wat haba u Bah AL Hek u la mihkhmat na jane ka constituency la 25 snem,” u la kynthoh.
Haba kylli halor ka jingtrei borbah ka pisa ha ka elekshon u Bah PN Syiem u la jubab, “Ka pisa ka la pynhiardor shaba palat ïa ka jylla ym tang ïa ka constituency namarkata nga kyrpad ïa ki paidbah ba kin ym ngop shuh ha ka pisa hynrei ban jied nongmihkhmat uban long u nongthaw aiñ bad uba don ka jinglah ban kit ïa ka lyngkor ba la bynshet ki paidbah namar ka jingsahdien ha ka pule puthi, ka koit ka khïah, ka ïoh ka ka kot ka dei namar la trei jubor ka pisa ha ka elekshon.”
Na ka liang u Bah Predecessor Rumnong u la ong ba ka jingwan ïasnoh jong u sha ka Congress ban kyrshan ïa u Bah PN Syiem ka dei namar u ïohi ba dei tang ka Congress kaba lah bn kyntiew ïa ka jylla bad ïa ka ri hi baroh kawei.
Lah ban kdew hangne kumba long myta ki kyrtong kiba la pynkhreh ban aireng ha kane ka elekshon kaba mynta na Pynthorumkhrah ki kynthup ïa u Bah AL Hek uba long ruh u MLA ba mynta uban ïakhun na ka BJP, u Rocky Hek na ka NPP, u Bah PN Syiem na ka Congress, u Babu Mayborn Lyngdoh na ka VPP, u Bah Samborlang Diengdoh kum u kyrtong shimet.