Lum ïa ka dorbar Hima ba u khun u hajar un ïoh jingshai, ong u Bah John

Shillong, K’lyngkot, 27: U John F. Kharshiiing u la ong ba um sngew sngewphylla shuh ïa ka jingkynthoh jong u Acting Chief ka Hima Mylliem u Bah Ainam M. Syiem bad ki Myntri ha ka sngi Thohdieng pyrshah ïa u bad ong ruh ba ka ophis jong u Syiem ka Hima Mylliem ka dei ban lum shwa ïa ka Dorbar kaba u khun u hajar un ïoh jingshai bad ïa ki nia ki jutang yn sa ïa pynshai hapoh ka dorbar.
“Kumba long mynta baroh ki nongsynshar ki hab ha ka jingshah thung (appointment) da ka “Sanad” kin hap ban ïada ïalade bad kim lait kren ïa kaba dei ban kren,” ong u Bah John ha u kyrwoh ba la phah ha ka sngi Thohdieng.
“Nga la shah jied kum u Nongaiktien jong ka Federation of Khasi States (FKS) la bun bun snem bad shah jied biang ha ka 17 tarik, Jylliew 2019 bad haduh kine ki sngi ym shym ïoh kano kano ka jingtip ba don ka jingïalang FKS lane ka shithi ba pyntip ïa ka rai ba la jied da kumwei. Lehse la mih ka FKS thymmai na KHADC kumba la mih teng mynshwa ka FKTI bad kiwei kiwei,” ula ong.
“Ha kajuh ka por ka la don ruh ka jingpynbeit ban jied khnang ïa nga kum u Chairman jong ki Khlieh nongsynshar, da ki khlieh nongsynshar hi (ha kaba na ka liang ka Hima Mylliem kim shym la don namar bun sien ki Acting Chief ki rieh ban poi jingïalang FKS) namar ngam dei uba shah teh hatkari ha kata ka (Appointment), “SANAD” bad ka jingjied ïa nga ka long namar nga kloi ban kren ban ïada ïa ka hok ki khun ki hajar bad khamtam ki jingeh jong kiba bun ki hima kiba shah ñion beiñ na ka por sha ka por,” la ong shuh shuh u Bah John.
“Ngam sngewpher ïa ka jingkren jingkynthoh jong ki bapli ki shah teh ha ka “Sanad” bad ki hap ban kren ban pyrshah ïa kitei ki jingai jingmut ki ban wanrah jingshai ha ka synshar khadar ka Hima Mylliem kaba la sah Acting bun bun snem, ki jingkynthoh shimet kim don jingmut kiba kham kongsan ka long ba kin ïa pyrkhat kumno ban lum ïa ka Dorbar Hima ban ïa kren ïa kiba bun ki jingeh jong u khun u hajar to ngin ïa lum kien ïa ka Dorbar Hima kein ngin ïa sei ïa ka nia ka jutang hakhmat u khun u hajar bad lada nga bakla nga kloi ban weng ïa ki jingai jingmut,” u la ong.
“Kat kum ka dustur kumba la batai da kiba bun ki syiem tymmen ka Dorbar Hima Mylliem ka dei ban long man ka snem bad kumta ka “Mylliem Act 2007” ruh ka ong dei ban lum Dorbar Hima shisien shi snem kine ki rangbah ba mynta kiba mih thymmai pat ki kwah ban rieh na ka Dorbar Hima da kaba ai daw hana ba dei ban lum tang ha ka saw ka sian. Mano ba ïalam bakla hangne u khun u hajar u long uba shai bad u sngewthuh ïa kine kiei kiei baroh,” u la ong bad bynrap, “ngam sngew donkam ban jubab ïa ki jingkynthoh shimet namar ki khun ki hajar hi ki tip ïa ki jingshisha halor ki kam noh synñiang jong nga ha ka imlang sahlang.”