Nongstoiñ, K’lyngkot 27: Katba nangmih ki sngi ka United Democratic Party Nongstoiñ constituency ka la nang kiew sted haman la ki jaka, da ka jingwan pynïasoh jong ki paitbah ban ai jingkyrshan ïa u kyrtong jong ka party ha ka elekshon ban wan. Mynta ka sngi thohdieng ka 27 tarik Kyllalyngkot ha ka jingïalang paitbah kaba la pynïaid da u bah B.Sohshang sordar jong ka shnong Marngor, da ki spah ngut ki nongkyrshan jong kiwei pat ki party kum na ka Congress, HSPDP, NPP bad PDF ki la wan ha katei ka jingïalang na ka bynta ban ai ka jingyrshan ba pura ïa u bah Polestar Nongsiej u kyrtong jong ka UDP na Nongstoiñ.
U bah P.Lyngkhoi na Laitkseh u Nongïalam ba radbah jong ka HSPDP, nangta na u bah P.F.Lyngdoh na Langlew u ba dei u nongïalam ba hakhmat duh jong ka Congress naduh u snem 2003, bah H.S.Bani nongïalam ba radbah ka Congress na Marngor, u bah L.G.Nongsiej MDC barim ka Nongstoiñ, u bah Allantry Dkhar Vice president ka UDP hapoh ka jylla bad u bah Moslandar Marngar president ka UDP Nongstoiñ, ki la ai ki jingkren ba la pynhun jrut sha baroh ki paidbah.
U bah Polestar Nongsiej u kyrtong jong ka party, haba kren ha katei ka jingïalang u la ong ba baroh ki shnong ha katei ka thaiñ ki dei kiba im ha katei ka thaiñ ki dei ki nongrep bad u biskot u dei u mar rep ba kongsan jong ki, hynrei haba u poi man ka por ha katei ka thaiñ ki nongrep biskot ki ud ki nam, namar ba ka ïew kahat kam biang bad ki shah khñiot palat ïa ka dor ha ki nongthied. U bah Nongsiej u la ong ba dei halor katei ka jingeh ba ki nongrep biskot ki ud ki nam, ba u la hap ban shim ïa ka rai rangbah ban ïaleh ïa kane ka elekshon namar u don ka jingkitkhlieh na ka bynta ki nongrep.
U la ong ruh ba naduh u snem 2015 u la ïatrei shitrhem bha bad ka shnong Laitkseh na ka bynta ban kyntiew ïa ki samla ha ka kam ïalehkai sport. Haduh mynta u dang ïai ïatrei lang namar u don ka jingthrang bad angnud ban kyntiew ïa ki samla kiba don ïa ka sap ha ka kam ïalehkai sport bad u da kwah eh ba ki samla jong ka West Khasi Hills, kin long ki khlur ha ka jingïalehkai phutbol bad kiwei kiwei ki sport bad ba kin paw ym tang ha ka jylla hynrei ha ka ri India baroh kawei.
Nalor kata u la ong ba lada phai ha ka jingeh ba ki paitbah ka thaiñ Marngor ki ïakynduh, ka dei hadien ba ka Mawthadraishan Block ka la hap noh ha ka Eastern West Khasi Hills bad ïa ki shnong ka thaiñ Marngor la phah noh sha ka Nongstoiñ Block, kaba la ktah haduh katta katta namar ka Nongstoiñ Block ka jngai kumba 21 kilomitar na Nongkasen. Katba ka Mawthadraishan Block pat ka jngai tang 3 kilomitar na Nongkasen na ka lad ban leit sha Marngor.
Halor katei ka jingeh jong ki paitbah u bah Nongsiej u la pynshai ha ki paitbah ba u la dep ïakren bad u bah Metbah Lyngdoh MLA ka Mairang, ba dei ruh u Lamphang ha ka ïing Dorbah Thawaiñ ka jylla, ha kaba u la kular ba hadien ka elekshon lada ka party ka don ha ka sorkar, un sa ïaleh katba lah ban pynphai biang ïa kitei ki shnong sha Mawthadraisshan Block.
Hadien ba la wai ka jingïalang khlem poi pyrkhat puk la mih ki paitbah ha madan ha kaba ki la ïashad ïarisa haduh ba ka madan ka la tdem hi puk. Kumba ka paw imat ha shnong Marngor, ki paidbah baroh ki la ïa noh lympat lut ha ka Bom jong ka UDP.
