Nongstoiñ, Nohprah 01: Ka Mawrusyiar Youth and Cultural Club, ka khot ka wer sngewbha ïa ki samla ka thaiñ Nongstoiñ kiba na ki shnong bapher bapher, ba kin wan ban ïashimbynta lang ha ka jingai jinghikai kaba la tip ruh kum ka Career Guidance ka ban sa pynlong ha ka 8 tarik u Nohprah 2023.
Ïa katei ka jingai jinghikai yn pynlong ha Trysem Hall DC ophis bad yn ïoh ïa ki jinghikai shaphang ka Hotel Management bad kiwei kiwei ha kaba ki nongai jinghikai kin wan na sor Shillong.
La ong ba katei ka dei kawei na ki prokram kaba long kum shibynta ban rakhe ïa ka jingkynjoh sha u Mawmer ba 50 snem jong ka club, ïa kaba yn ïoh ruh ban pynkut noh ïa katei ka Jubili Ksiar ha u bnai Kyllalyngkot jong u snem 2024.
Ka Club ka la ïoh ban rakhe lehkmen kyrpang ïa kane ka snem da ki jingpynbyrñia bad ki jingïalehkai bapher bapher mynta baroh shi snem kynthup ïa ki jingïalehkai kynjatbor, Volleyball, jingïakop Rwai, jingïakop Shad bad kiwei kiwei.
Ïa katei la ïoh ban pyntip da u bah Eric Kharsyntiew Vice president ka MYCC Mawrusyiar Youth and Cultural Club ha ka jingïakren bad u nongthoh khubor.
Kum ban shu pynkynmaw ba katei ka Club ka dei ruh kawei na ki Club kaba la ïoh ban khur ïa ki ar tylli ki Khusnam kynthup ïa ka State Level Outstanding Youth Club Award 2021 2022 bad ka District Best Youth Club Award 2021 2022.
