Ïa ka jingpang HIV/AIDS lah ban tehlakam dei lyngba ka jingiatreilang bad donkam ban leit phah test sha ki centre

Khliehriat Nohprah 01:Ka ophis jong u District Integrated Strategy for HIV/AIDS (DISHA), Khliehriat ha ryngkat ka jingïatreilang bad ka Mihmyntdu Community Social Welfare Association, kumjuh ruh ka Targeted Intervention Counselling Centre (MCSWA, TI CC), ka Chankylliang Development Society (CKDS-LWS), OST Centre, Khliehriat, AHANA, VIHAAN ha rynggkat ka jingkyrshan lang ka tnat jong ka Project Director, Meghalaya AIDS Control Society (MACS), Shillong bad ka District Legal Services Authority (DSLA), East Jaintia Hills District mynta ka sngi la pynlong ïa ka prokram ba kyrpang ha Community Hall ha Dkhiah ha kaba la rakhe ïa ka sngi kyrpang jong ka jingpang Aids lane ka World AIDS Day.
U muktiar, uba dei ruh u Public Prosecutor, District and Sessions Court, East Jaiñtia Hills District, u bah S.Pdang haba kren kum u kongsan u la ai ka jingkhublei ïa ka District Integrated Strategy for HIV/AIDS (DISHA), bad ka MCSWA kiba la trei shitom bad pynurlong ïa kane ka prokram mynta ka sngi kaba iadei bad ka jingpang HIV/AIDS kaba wanrah ruh ïa ka jingiashim bynta lang ki paidbah kiba na ki shnong bapher bapher, kaba don ruh ka jingthmu ban tehlakam ïa kane ka jingpang HIV bad AIDS, u la pynpaw ruh ïa ka jingsngew khia halor ka jingshim sting ki briew namar ba kim don ka mon ban leit sha ki jaka test bad test ïa kane ka jingpang la ka don ne em ha ka met jong ki, kane ka jingshim sting lehse kam buh jingma ïa ka imlang ka sahlang baroh kawei.
U la ong ruh ba kane ka jingpang ka don ki lad ban ïada ban lait na ka jingsaphriang u khñiang jingpang lada ki briew ki shim ka jingïatreilang bad ki tnat lane ki agency kiba dei peit, u kyntu ïa ki paidbah ba ki dei ban mih shakhmat ban phah test
U District Medical & Health Officer, East Jaiñtia Hills District, u Dr D.Shylla, u la batai kham bniah shaphang ki centre kiba don hapoh ka district kiba lah ban ai ka jingshakri ïa kito kiba la shah ktah ha kane ka jingpang, ha ki centre lah ioh ban ioh ïa ki jingiasyllok lem bad ki lad jingsumar, u la ong ruh ba ïa kane ka jait jingpang lah ban tehlakam dei tang da ka jingïatreilang..
Kiba la ai jingkren ki kynthup ruh ka kong Rinibeth Patlong, kaba dei ka Program Manager, Mihmyntdu Community Social Welfare Association (MCSWA), ka kong Philia Paslein, kaba dei ka Counsellor, ICTC Khliehriat u, Dr. J Nongtdu, M.O, Opioid Substitution Therapy (OST) Centre, Khliehriat, ka kong Nisha Rynniaw DMDO, DISHA Khliehriat, u bah W Dohling, DD, Prevention Division, Meghalaya AIDS Control Society (MACS), Shillong.