Jowai, Nohprah 01: Ïa ka lehñiam Ku Tyngkong u Pator ka Elaka Jowai, u Raymond Nartiang ha Yung Langdoh ka Raij Chyrmang la pyndep hynnin ka sngi 30 tarik u Naiwieng 2023 kaba long ruh ka sngi sha jingkymmaw.
Ha ka por mynstep ki nongkitkam ñiam na Jowai kila ïa mih naduh u Dolloi ka Elaka, u Puramon Kynjing, u Pator, ki waheh wasian, ki nongkitkaam ka Seiñraij Jowai nadooh u President, u Hercules Toi, u General Secretary u Arwotki Sumer, kiba haïing u Pator bad kiwei de.
Ynda la poi ha Lynter (bynta ka Wah Myntdu) ki khun ka Raij Chyrmang kila ap lypa ïa u Pator ban bah ïa u Pator sha shilliang Wah ha ryngkat ka jingrisa, beit beit kila leit sha ïing u Langdoh ka Raij Chyrmang da ka jingpdiang burom ïa u Pator shapoh ka Raij da ka kynshait um hashwa ban rung ha phyllang ka ïing kyntang.
Hapoh ka ïing Langdoh hadien ka Ku Tyngkong u Pator la ai ïa ka jaiñspong ha u Langdoh ka Raij, u Dalammi Joh bad ka muka rangkat ka pliang nar ha Ka Langdoh.
Ha kane ka sngi la ïadonlang u Langdoh ka Raij Ialong wa u Langdoh ka Raij Tuber, ka jingpyndep ïa kane ka lehñiam Ku Tyngkong ka long ka bynta ba kongsan bha ïa u Pator ban ithuh pura ïa u, kumta lada don kino kino ki jingbym biang hpdeng ki Raij lane ki Soo Langdoh ka dei ka kamram jong u ban pyndep bad lada ym lah ban leh ïa kane un pyntip sha u Dolloi khnang ba ïoh leh ïa kaba donkam.
