Nongstoiñ, Nohprah 01: Ka Sorkar India ka la dep ban pyntreikam ïa ka ka Viksit Bharat Sankalp Yatra naduh ka 15 tarik U Naiwieng 2023, kaba dei shi bynta jong ka campaign ban pynshai bad pynsngewthuh ïa ki skhim sorkar kiba pher kiba ki paidbah ki dei hok ban tip bad ban ïoh jingmyntoi na kita ki skhim.
U Deputy Commissioner ka West Khasi Hills District u la pyntip sha baroh ki nongshong shnong ba ïa ka ‘Viksit Bharat Sankalp Yatra’ hapoh West Khasi Hills Disrtict la sdang naduh ka 28 tarik u Naiwieng 2023 bad ka ban kut haduh ka 25 tarik u Kyllalyngkot 2024 ha baroh ki Block kiba don hapoh jong ka District.
Kin don ki nongtrei sorkar ki ban wan ha ki shong ki thaw kiba la pynbeit ban pynlong ïa kane ka yatra na ka bynta ban ai jingtip, ban pynshai paidbah, ban ïa phylliew jingmut bad ki nongïoh jingmyntoi bad ban pynïoh ïa ki skhim sha kiba dei hok ban ïoh.
Mynta ka sngi ka 30 tarik u Naiwieng 2023 ïa kane ka juh ka programme la pynlong ha Dorbar Hall ha ka shnong Nongspung West Khasi Hills District, ha kaba u bah V Swer ADC bad Project Director ka DRDA u la long u kongsan.
Haba ai jingkren u bah Swer u la ïathuh ba ka jingthmu jong kane ka programme, ka long ban ïathuh ïa ki central scheme kum ki flagship scheme ba ïoh ki paidbah kim tip ïa kine ki scheme sha baroh ki nongshong shnong jong ka Ri India.
U la ïathuh ruh ba hangne hapoh ka District ruh yn pyntreikam ïa kine ki scheme, khamtam ban ïoh pynrung kyrteng ïa kito ki nongshong shnong kiba pat ïoh ïa kine ki jingmyntoi bad ban ïoh sngew ruh ba kumno ki paidbah ki sngew shwa ba kin ïoh ïa kine ki scheme bad haba ki la ïoh ïa kine ki scheme.
U la pynkut ïa ka jingkren da kaba ïalam ïa ka jingpule ïa ka soskular ne ka pledge ïa baroh ki nong ïa shim bynta. Ha kane ka programme la don ka jingpynshai ïa ki skhim Sorkar kiba pher ba pher sha ki paid nongshong shnong kum ka JJM, NRLM, ICDS, PMUY (free gas connection), MGNREGA, old age pension scheme (IGNOAPS), PMAY-G, Aadhaar Enrollment, Smart Card NRHM nalor kiwei kiwei pat kiba la ïoh jingpynshai na ki department bapher bapher, khnang ba ki paidbah kin ïoh ïa kine ki jingmymtoi kiba wan na ka Sorkar Kmie.
