Shillong, Nohprah 1: U MLA ka South Shillong Constituency u Bah Sanbor Shullai mynta ka sngi Thohdieng ula lum ïa ka jingïalang ha State Convention Centre, Shillong ban ïatai sani halor ki kam pynroi kiba ïadei bad ka umbam umdih bad ki surok, kiba la pyntreikam bad ki ban dang pyntreikam hapoh ki shong kiba hap hapoh jongka South Shillong Constituency.
Haba ïakren bad ki nongthoh khubor hadien bala wai ka jingïalang, u Bah Sanbor Shullai ula ïathuh, ba ha kane ka jingïalang kaba ula lum, la ïakren halor ka jingpyntreikam ïa ki kam pynroi ha ka Constituency na ka bynta ka bit ka biang jong u paidbah.
“Ngi la ïakren sani halor ka skhim Atal Mission for Rejuvenation and Urban Transformation (AMRUT) kaba la mang naduh u snem 2001-2002 bad nalor kane ka skhim, ngi la ïoh ruh ïa ki skhim na ka sorkar jylla lyngba ka tnad PHE bad SMB ban pynbiang ïa ka umbam umdih ïa ki paidbah ha ka thaiñ Laban, Lumparing, Kenches Trace bad Madan Laban” ong u Bah Sanbor.
Ula ong, ba kane ka dei ka skhim kaba thymmai bad ka dei ka Additional Water Supply Scheme ïa ka thaiñ namar ka jingbun ki nongshong shnong, ki jaka sah, ki Guest House bad kiwei kiwei bad ka jingdonkam ïa ka um ka la bun bha.
U Bah Sanbor ula ïathuh ba da ka jingïatreilang ka tnad PHE bad SMB la ïoh ïa ka bhah tyngka kaba T.7.74 Klur tam ban tan ïa ka um na ka Wah Jalanoh bad ka Umsohphienam bad kiba bun ki bynta la dep ban shna ïa ki top um bad la dep ruh ban pynïaid ïa ki pipe um bad kaba sah ka long sa tang ban pynpoi ïa ka um lyngba ka Distribution Line.
`Ula ong ruh ba ka don sa kawei ka skhim ban shim ïa ka um na ka Wahrisa hynrei ha ki shisnem shiteng, ka Tnad Forest kam shym la ai jingbit ban shna ïa ka top um ha ka jaka jong ka, hynrei mynta kala ai jingbit ban tei ïa ka top um na ka bynta ban pynpoi um sha Lower Lumparing, Lumdorbar Lumsohphoh bad ka tnad PHE ka la dep siew ruh T.3 Lak sha ka tnad Forest.
U MLA ula khmih lynti ba ki kam ki jam kin sa sdang noh mardor bad ula kyrpad ïa ki heh ophisar ba kin ïatrei ryngkat bad ki Dorbar Shnong ban pynïaid shakhmat ïa ki kam ki jam khamtam ha kane ka aiom tlang ka ban long ka jingmyntoi ïa ki paid nongshong shnong.
Ha kaba ïadei bad ki surok kiba don ha ka Constituency, u Bah Sanbor ula pyntip ba ula pynïoh ïa ka bhah tyngka kaba kot T.34 Klur ban shna ïa ka surok ha ka shnong Lumparing, Lower Lumparing, Laban, Kenches Trace, Rilbong.
Ula ong, ka jingïalang la kyntu ruh ïa ki Kontraktor ba ki dei ban pynsted ïa ka jingtrei ha ka ban shna ïa ki surok bad ban pyndep noh ïa ka kam hashwa ban slap, ban pynsuk ïa ka leit ka wan jong ki paidbah.
Ha katei ka jingïalang la wan ban ïashim bynta da ki heh ophisar jong ka tnad Shillong Municipal Board, ka tnad Urban Affairs, PHE, PWD bad ki Nongïalam na ki Dorbar Shnong bapher jong ka South Shillong Constituency
