Nongstoiñ, Ïaïong, 5: Kum ka dak jong ka jingkynmaw ba ka san tarik u bnai Ïaïong jong man la u snem, ba ka dei ka sngi ba ka pyrthei shi tyllup ka rakhe kyrpang na ka bynta ka um. Kumta ka ophis jong u Superintendent Engineer jong ka Public Health Engineering Western Circle Nongstoiñ, ka la pynlong ïa ka jingrakhe ïa katei ka sngi ha Nongstoiñ da ki jingrwai bad ki jingpynshai.
Ïa ka jingrakhe la pynlong ha ki lai tylli ki jaka kata ha Nongpyndeng, ha khmat ïew Nongstoiñ bad ha Upper New Nongstoiñ. Ha ka programme kaba la pynlong ha kitei ki lai jaka, ki nongtrei jong ka ophis u SE ki la pynshai ba ka um ka dei kaba donkam tam ha ka jingim ba man ka sngi jong ki nongshong shnong, kumta ka donkam haduh katta katta ban tyngka bad pynneh pynsah ïa ki tyllong um.
Nalor kata ki la pynshai ruh ba ha ka sor Nongstoiñ ki don ar tylli ki wah kiba tuid sawdong jong ka, kata ka wah Nondeiñ bad ka wah Nanbah. Hynrei katba nang mih ki sngi kitei ki wah ki la nang jaboh, namar ka jingbym nang jong ki nongshong shnong ban sumar ha kaba ki jaboh jabaiñ na baroh sawdong ki tuid sha kitei ki wah. Ki la ong ruh ba ka la dei ka por ba ki paitbah ka sor Nongstoiñ, kin thaw ki lad ki lynti kumno ban pynlong ïa ka um ha kitei ki wah kaba khuid kaba long ban dih.
Ki nongtrei ka PHE ki la kyntu ruh ïa ki paitbah ba kin ñiewkor ïa ki pipe um kiba la pyntrei da ka sorkar lyngba ka Jaal Jivan Mission, lane la skhim umbam umdih ba kyrpang na ka bynta ki nong-kyndong. Namar lyngba ka jingpyntreikam jong ka sorkar pdeng ïa katei ka skhim, ïa ka umbam umdih dei ban pynpoi ha man la kawei pa kawei ka thliew ïing ha baroh ki nongkyndong. Lada ki lap ba ki pipe um ki dkut ha ki lynti, ki surok bad kiwei kiwei ki jaka, ki dei ban pyntip sha ka ophis jong u SE ne ha ki muster roll kiba la thung ha ki shnong jong ki.
Ha ka jingrakhe ïa katei ka sngi la pynitynnad ban pynphuh pynphieng da ka jingshad jong ki khynnah samla kynthei bad ki jingrwai da ki nongrwai bat bit bad kumjuh ruh na ki aktor.
Ka jingrakhe ïa kane ka sngi ba kyrpang jong ka um, ka don ka jingïadei bha ruh bad ka bynta ban pyn-sngewthuh ïa ki nongshong shnong, kumno ban pynneh bad tyngkai ïa ki khlaw ki btap, ki dieng ki siej. Namar lada ki khlaw ki la syllen, ki tyllong um kin tyrkhong, ki wah duid kin rngad bad ka jingbei pisa jong ka sorkar pdeng sha ka sorkar jylla na ka Jaal Jivan Mission kan ym don jingmut.
