Nongstoiñ, Ïaiong 5: Ka jingbym don jong ki lynti ïaid kjat kiba biang (Footpath) ha ki katto katne tylli ki surok kiba don ha sor Nongstoiñ, ka la buh jingsyier shisha ïa ka imlang sahlang khamtam eh ïa ki khunlung bad khynnah skul, khamtam kito ki bym pat nang kumno ban phikir ïa la ka jingim ha ka por ba ki ïaid ban leit sha la ki skul.
Kitei ki surok ki bym don footpath ki kynthup ïa ka surok kaba mih na Nonbah sha St Savier, kaba mih na Nonbah sha Anderson bad kiwei kiwei de ki surok kiba long ka jingma shisha na ka bynta ki khynnah skul bad ki riew paidbah.
Haba ïadei bad kane ka phang, mynta ka sngi na ka liang jong ka seng HNYM hapoh ka jingïalam jong u samla Tailan Star Lyngkhoi President HNYM West Khasi Hills District, ka la leit ban ai da ka jingthoh sha u bah Garod LSN Dykes khlieh duh jong ka West Khasi Hills District, ban dawa na ka sorkar ba kan shimkhia ïa kane ka kam da kaba phah shna noh ïa ki footpath, namar ka long kaba la i donkam kham kyrkieh.
Ka seng ha ka jingïakren bad u nongthoh khubor, ka la ong ba nalor ba ka sor Nongstoiñ ka dei ka Head Quarter jong ka District kaba lah rim bha, ka long ruh ka District kaba heh bad ki kali ruh ki lah bun. Kumba long mynta kitei ki surok ki dei ruk ki surok bah, kumta lada ym don jaka ïaid kjat ka lah ban wanrah ïa ka jingmynsaw bad ka jingsngewsih ïa ki paidbah.
Kumta ka seng ka sngew dei ban kyntu sha ki bor ba dei peit bad sha u nongmihkhmat, ban phai lem sha kane ka bynta kaba long ka jingdonkam shisha na ka bynta ka jingbit jingbiang ha baroh ki bynta, kyrpang na ka bynta ki khynnah skul.
