Nongstoiñ, Ïaïong, 5: Ka jingbym lah jong ka sorkar ban pynbiang ïa ka rukom treikam ha Parïong Primary Health Centre, ka la pynlong ïa ki paitbah ba kin ïakynduh jingeh ha ka por ba ki leit phah sumar haba ki pang ki shitom.
Halor kane ki nongïalam ka Hynñiewtrep Youth Council Mawthadraishan circle, hadien ba ki la ïoh jingtip halor ka jingbym biang jong katei ka jaka sumar, ki la hiar ban jurip bad ki la lap ba katei ka jaka sumar ka dang donkam bun bha ki bynta ban pynbiang ha kaba ïadei bad ka jingsumar ïa kiba pang ba shitom.
U bah Shembor Langrin President ka seng haba pyntip ha u nongthoh khubor, u la ong ba ha katei ka jingleit jurip ki la lap ba ki jingduna ki long naduh ka jingdon jong ki nongtrei, ka jingbym shimkhia jong ki nongtrei kiba lah dep don lypa. U la ong ruh ba kaba sngewsih ka long ba katkum ka jingïathuh jong ki nongpang kiba leit phah sumar ha katei ka jaka, ki la ong ba ki don ki por ba ynda la poi ka sngi thohdieng ïa ki nongpang kiba wan phah sumar ha katei ka jaka, ki hap ban pynkynriah sha kiwei pat ki jaka sumar bad katei ka jingleh ka pynjynjar haduh katta katta ïa ki nongpang.
Utei u nongïalam ka seng u la ong ruh ba ki la ïoh ban ïakren ruh bad u Doktor u ba peit ïa katei ka jaka sumar bad haba ki la kylli ba ka don ne em ka jingpynkynriah ïa ki nongpang na katei ka jaka sumar kumba la kynnoh da ki nongshong shnong, u Doktor u la pynshai ba kam shym la don kaba kum kata.
Katkum ka jingong jong u Doktor la ong ba ka jingduna nongtrei ka don shisha. Dei na katei ka daw ba ym shym la lah ban pynbiang ïa ka rukom sumar ïa ki nongpang kumba ki dei ban ïoh. Ha kaba ïadei bad kane na ka liang ka seng ka dawa na ka sorkar ba kan pynbiang noh ïa katei ka jaka sumar na ka bynta ka jingmyntoi ki paidbah nongshong shnong.
Ka sorkar ka dei ban thung noh ïa baroh ki nongtrei naduh ki Grade IV, Ward attendance, ka jaka sah ki staff Nurses, paiñkhana paitbah, ban pynheh shuh shuh ïa ka building bad ban pynbiang ïa ki kamra.
