Wer ka NEHUSU bad HYC ïa ki samla pula ban tur sha ophis MBOSE na bynta ka scholarship

Shillong, Kyllalyngkot 2 : Ka North Eastern Hill University Students’ Union (NEHUSU) lem bad ka Hynniewtrep Youth Council (HYC) ki khot bad ïawer ïa ki samla pule ban ïalum lang hakhmat ophis jongka MBOSE ha ka Sngi Balang kum ka dak ban pynpaw ka jingpyrshah jur halor ka jingleh bym suidñiew jongka sorkar ban pyllait ïa ka baibam ne ka scholarship jong ki samla pule.
Ha ka kyrwoh ba la pyllait da u General Secretary ka NEHUSU u samla Banpynbiang Riang la ong “ La palat shisnem mynta naduh ba ngi la ïoh pdiang ïa ka baibam ne scholarship jong ngi. Kane ka pisa kaba la mang ban siew na ka bynta ka bai pule, bai bam, bai hostel, bai dawai la shu pynduh beaiñ ïa ngi. Kane ka long ka jingïuhroit halor ka jingim jong ngi.Ngi hap ban shu shaniah lut nadong shadong ha ki kmie ki kpa bad kiba haïing hasem jong ngi kiba wat hapdeng ka jingkit kaba khia ki la hap ban tynrong sa na ka bynta jon ngi hapdeng ka jingduk jingkyrduh ruh. Kane ka jingpynslem ban pynlait ïa ka scholarship ka la nang pynkiew ruh ïa ki samla kiba hap ban sangeh pule noh tang shiteng por. ïa ka jingthrang bad jingkhmih lynti jongngi ban kiew ha ki jingpule na ka bynta ka lawei jong ngi la pynduh mynsiem noh da ka sorkar bad kane ka buh ïa ka jingim jong ngi ha ka jingma kaba khraw”.
Kane ka jingpynslem ban pyllait ïa ka scholarship kam dei satia ka jingbakla ba dei hok hynrei ka dei ka jingïuhroit ïa ki hok jong ki samla pule da ka sorkar, ong biang u General Secretary.
Ha kane ka juk kaba buh hakhmat eh ïa ka jingnang jingstad, la shim pat ba la leh kam khaïi beaiñ da ki katto katne ki riew shim kabu kaba la buh ïa kiwei ha ka jingeh namar ka jingrem palat ka bai pule puthi namar kiba bun ki samla pule ki wan na ki long ïing longsem kiba duk ba kyrduh bad kane ka jingpynslem ka pynpaw ba ka sorkar kam don ka jingkitkhlieh na ka bynta ka bha ka miat ki samla pule. Kane ka la dei ka kam iap kam im na ka bynta ki samla pule bad ka jingdawa ka long ba ka sorkar ka dei ban pyllait kloi noh ïa ka baibam ki samla pule.
Kane ka jingïamih bad ïalum paidbah ruh ka long kum shi bynta ban pynpaw hakhmat ka sorkar ba kam lah ban ïaleh khun jakai bad ki samla pule bad ka long ruh kum ka dak jong ka jingsdang jongïakhih kaba jur lada ka sorkar kam leh ei ei. Lada ka sorkar kam ai jingkular ki samla pule kin ym kynriah shuh wat tang shi inshi ruh na khmat ka ophis MBOSE.Namar haba ka jingbym hok ka la long aiñ kumta ka kamram ka long ban ïakhun beit da kaba tyngeh khlem kynran dien.