Shillong, K’lyngkot 02: Uwei u nong Tamilnadu u la dro ne pynwan dur ïa ka dur u Bah Ardent Basaïawmoit da kaba pyndonkam da ka bor jong ki kjat sngi.
Ka video ba la post ha ka status jong u President ka Voice of the People Party, ka pyni ba une u nongdro ba ki ju ong u Sunlight Artist, u la pynshah da ka ïit kaba rit da kaba pynphalang da ki kjat sngi ha ka lyntang ba Stang kum ka plywood bad pynwan dur thik kum ka dur u Bah Ardent.
Haba la kylli na u Bah Ardent halor kane ka jingdro ne pynwan dur ha ka rukom kaba kham pher ïa ka dur jong u, u Bah Ardent u la ong ba na ka liang jong u ruh um ithuh ïa une u nongdro ne u artist, hynrei u shu tip ba udei na Tamilnadu namar la don ba phah sha u da ka video ban ïathuh ba don kiba la dro ïa ka dur jong u da kaba pynwan dur da ka bor jong ki kjat sngi ha ka lyntang.
Kane ka rukom pynwan dur kam dei kaba suk, hynrei ka donkam bun ka por bad ka jingïaishah bad ka jingtbit ruh jong u briew ne u artist, ban pynwan beit thik ïa ki kjat sngi ha ka jaka ne ka bynta ba la dro lypa malu mala da u let.
U Bah Ardent u la pynpaw ka jingkmen bad lyngngoh ruh ba ki briew wat shaduh Tamilnadu ruh ki la tip ïa ka nam bad ka kyrteng jong u, ha kaba la mih kum kine ki artist ban dro ïa ka dur jong u ïa kaba u da pynpaw ka jingkmen ïa ka jingtbit une u nongdro.
