Sahdien ka NE ha ka thohdur watla ki sap nylla jong ki Barikor ki ïai shylluit manla ka por

Shillong Kyllalyngkot 2 : Ka synjuk ki barikor na jylla Meghalaya, ka Ri Academy of Visual Arts ka la pynlong ïa ka lyngwïar thohdur jong ki barikor ha ICSSR, NEHU ba la plie da u Kher Rangbah ka tnat sorkar Mattithaw bad Deiriti, u Bah Frederick Roy Kharkongor. La ïasnoh kti lang da ka Santiniketan Kala Bhavan Praktoni, ka synjuk ki barikor rangbah na Santiniketan na ka bynta ban sei pyrthei ïa ki sap kyrpang jong ki samla ka jylla ki ba angnud ban trei bad kyntiew ïa lade kum ki barikor batbit. La aiti sahnam ïa kane ka lynwïar thohdur ha ka kyrteng jong u Myllung Soso Tham, kum ban sot na ki snap jingstad jong ka saiñ pyrkhat jong u na ka bynta ban tei ïa ka imlang sahlang. La nguh burom ïa u Myllung Soso Tham da baroh ki ba ïa don ryngkat naduh ki kynrem ki lyndan haduh ki paidbah da ka ba thoh shun ha ka sladur ba la mang lypa na ka bynta ka jingthmu. U kongsan ha kane ka lyngwïar thohdur, u Bah F R Kharkongor u la pyrto ïa ka thoh ka tar ka ba la kyrsoi na ka janor bad dohnud jong u Myllung Soso Tham ha kita ki snem ki ba ka imlang sahlang ka dang doh ha ki latlat jong ka synshar donbor ka sorkar Bilat bad ha ba dang sdang seilung ka thoh ka tar Khasi. U la pynkynmaw ruh ba ka snap tynrai Khasi ka shong tynrai ha ka khyndew, ka kur bad ka ktien, ha ka ba donkam ban pynneh pynsah na ka bynta ka lawei jong ka imlang sahlang.
Ka jinglong dukha jong ki barikor ha ka lynti jingim ka long ka phang ka ba la phalng lyngba ka jingkren jong ki kynrem lyndan ha kane ka sngi, ba kynthup ïa u khliehduh ka ICSSR u Prof B Panda, bad u Dr Janak Jhankar Narzari, u khliehduh jong ka Santiketan Kala Bhavan Praktoni. U Dr Janak Jhankar Narzari u la bynñïaw halor ka jinglong jingman ha ka thaiñ shatei lammihngi ka ba la sahdien ha ka lïang jong ka thohdur, wat lada ka mynsiemn shitrhem jong ki samla ka ïai kyrsoi bad na ka por sha ka por ki sap nylla jong ki barikor ki dang ïai shylluit manla ka por. U nongïalam rangbah jong ka synjuk ki barikor ha jylla, u Bah Raphael Warjri u la kubur ïa ka jingkren jong kita ki kynrem lyndan bad u la ban khïa halor ka jingdonkam ban mih ki shlem hikai shlem pule ha ka lïang ka kam thohdur thohdar ha jylla na ka bynta ban kyntiew ïa ki samla ki ba angnud ban kiew irat ha kane ka lïang. Kum shibynta ban kyntiew ïa ka thohdur thohdar ha jylla bad ban ban plie lynti ïa ki barikor na jylla, ka Santiniketan Kala Bhavan Praktoni ka la ïa soi ïa ka dorkhas soskular bad ka Riti Academy of Visual Arts, Shillong na ka bynta ban sam kyllïang ïa ki jingtip bad jingstad shaphang ka thohdur da ki lympung ki ba yn pynkhreh markyllïang ha Shillong bad sha kiwei kiwei ki jaka ha Ri Indïa.
Ha ka Lyngwïar Thohdur ka ba la ïaid shitrhem kumba shiphew sngi ha ICSSR, salonsari NEHU ka la don ruh ka jingïaphylliew jingmut jong ki barikor na baroh arlïang ha ka ba pyninam ïa la ki sap ki phong bad ban batai ïa ka jinglong jingman jong ka Thohdur ha la ki jylli lajong. Kumta ki don ki mat ïatai ki ba yn sa pashat jingmut da ki barikor na Shillong bad na shabar ka jylla ba kynthup ïa u Prof. Janak Jhankar Narzari, Soumitra Chatterji, Rathin Kanji, Prof. Nïaz Majumdar, Falguni Mukherji, Shamita Goswami, Ketaki Choudhury, Mario Pathaw bad Raphael Warjri, halor ki phang ba ki ïa tyngkhuh ha la shimet bad ki ba ïadei bad ka lyngwïar thohdur ha ka imlang sahlang.
Kum shibynta jong ka Lyngwïar Thohdur ba la jer Thoh Shun Art Camp 2023, ka synjuk ki barikor na jylla, ka Riti Academy of Visual Arts ka la pynphuh pynphieng da ka Khusnam ha ka kyrteng jong u Ma S Quotient Sumer ba la jer ka S Quotient Sumer Excellence Award 2023. ha kane ka sngi la pynkup burom ruh ïa ki barikor ba la shimbynta ha kane ka lympung ka ba la long ha ka 24tarik Nohprah, 2023. u kongsan ha kane ka sngi, u Dr Janak Jhankar Narzari, President ka Santiniketan Kala Bhavan Praktoni bad u Principal barim jong ka Kala Bhavan, Viswa Bharati University, u la pyrto bad ñiewkor ïa u nongjop ïa ka khusnam, u Ma Heibormi Sungoh u ba la synñïang sha ka roi ka par jong ka thoh ka tar Khasi. U Ma Heibormi Sungoh u dei u riewtbit bakhraw ha ka deiriti jong ka jylla Meghalaya, ba shlei da ki jingtip shaphang ka deiriti tynrai Khasi, khamtam ha la ka thaiñ Pnar jong ka Jaintïa Hills. U dei ruh u nongthoh, u myllung, u kaitor bad riewtbit ha ka rwai, ka put ka tem bad ka shad tynrai, u ba tip sani ruh ïa ki snap ka Nïamtre. Kum u nongthoh jong shiteng dorjon ki kot ha ka ktien Khasi bad phareng, u Ma Heibormi Sungoh u la shim bynta ha jylla, ha ka thaiñ, ha ka Ri Indïa bad katto katne ha satlak pyrthei ha ki lyngwïar ka thoh ka tar bad ka deiriti, bad u trei shitrhem ruh ha byllai ki shlem deiriti kynthup ha ka North East Zonal Cultural Centre. Ha ka ba ainam ban sien syntiew ïa ki kam bakhraw ba la noh synñïang ha ka jylla bad ha Ri Indïa, ka Synjuk Ki Riewtbit Riti Academy ka ñiewkor bad pynkup burom da ka Khusnam Kynmaw Tympang ïa u Ma S Quotient Sumer- 2023.
Ki khatar ngut ki barikor na Santiniketan ki long u Dr. Janak Jhankar Narzari, Soumitra Chatterji, Rathin Kanji, Prof. Nïaz Majumdar, Rishi Barua, Sheema Barua, Falguni Mukherji, Samita Goswami, Ketaki Choudhury, Saleha Ahmed, Krishna Dutta, Babita Das, bad na Shillong ki long u Mario Pathaw, Phaibha Kupar Kharlukhi, Benedict S Hynniewta, Frederick D Hynniewta, bad Raphael Warjri. U Dr Janak Jhankar Narzari u la kren sani halor ki kam thohdur jong u ki ba la sahnam ym tang ha Ri Indïa, hynrei ki ba la ieng kynshyeng ruh ha ki shlem thohdur bad shlem imlang sahlang ha kylleng ka pyrthei, khamtam ha ki Ri Europe. U samla Mario Pathaw u la pyninam bad kren bnïah halor ki kotdur ka jukshai mynta ba la jer ki digital comic book on Khasi cultural heritage titled ‘exploring the relationship between words , images and the indigenous representation of the Khasi Jaiñtïa people’ bad u bah Benedict S Hynniewta u la pyninam ïa ki kam thohdur ki ba naduh ki snem ki ba sdang jong ka kam thohdur jong u bad ki kam thohdur ba dang shen ba la shna lyngba ki kor ha ka jukshai mynta ba la tip kum ki digital format. U Soumitra Chatterji u la pyninam ïa ki dur thoh lyngba ka jingkren ka ba sani halor ka sawkun jong ki thaiñ Rilum ha kylleng ka Ri Indïa halor ka mat ba la jer ‘A glance at ‘Mountains’ in landscape painting of the Far East, Indïa and the West- and the influence of the same on my artistic journey’. U Prof. Nïaz Majumdar na ka American International University-Bangladesh, Dhaka, Bangladesh u la pyninam bad kren halor ka mat jong ka mïatdur bad mattithaw kum ki atïar jong ka pule dangle ka ba la jer “Education through Arts and Aesthetics: Teaching the Philosophy of Rabindranath Tagore”. ki barikor kum u Rishi Barua, Rathin Kanji, Ketaki Choudhury, Seema Barua, Falguni Mukherji, Samita Goswami and Babita Das ki la pyninam bad kren bnïah halor ki kam thohdur lajong lyngba ki ryta bad shaphang ka san ka mer jong ka thohdur ha Ri Indïa.
Ka jingpyninam ïa ka thohdur ka la rasong borbah da ka durim Apot ba la shna da u Raphael Warjri. La jan baroh ki barikor ki la ai jingïaroh bad kdew la ki jingsngew shimet ha ka ba pynwandur ïa ka durim ka ba la phalang ïa ka riti dustur tynrai bad ka deiriti bakynsai jong ki paidbynriew Khasi. U Dr Janak Jhankar Narzari u la kynthoh ba ka durim Apot ka la dei u mawnam jong ka kam shna durim ha ka thaiñ bad lehse ha Ri Indïa. U Prof Nïaz Mazumdar u la rah skong ïa ka mïatdur jong ka durim ka ba la phuhmat haduh katta katta. Kiwei kiwei ki barikor ki ba la khmih sani ïa ka durim ki la kynthoh ba ka durim Apot ka shongnïa ban ioh ka nam ka burom ka ba khraw ha ka lïang ka khana puriskam ‘U Tiewlarun’ ha ka ba pynishai ïa ka riti dustur Khasi bad ha ka jinglong janai jong ka rukom shna katkum ki kor ki bor ka juk mynta. Ha kane ka sngi u Raphael Warjri u la pynbna paidbah ruh ba la buhti ïa ka Khusnam Kynmaw Tympang ha ka kyrteng jong u Barikor Prithpal Singh Sehdave ba ju khot ieit u Ladi. Ka shlem barikor ka ba bud ryngkhi, yn sa pynkhreh da ka Santiniketan Kala Bhavan Praktoni da ka ba werlang ïa ki barikor na jylla ban shim bynta sha Santiniketan ha jylla West Bengal.
Ka la don ruh ka suwari sha ka shlem deiriti jong ka shnong Pahambir ba la khlieh da u Bah Rani Maring bad synran lang da ki khun ki pyrsa ban pynbïang da ka bam ka dih tynrai na Ri-Bhoi. Ha ryngkat ruh ki khanatang bad puriskam ba la ïathuh da u Bah Rani Maring, u la kynud da ki sur tynrai lyngba ki jingtem jingput tynrai kum ka duitara, ka maryngod, ka saitar bad ka mieng. Nangta ka la don ruh ka shang suwari sha ki lum ki wah jong ka thaiñ Sohra ka ba la pynbyrngïa ïa baroh ki barikor na Santiniketan.