Shillong, K’Lyngkot, 02: Ka jingmaramot ïa ka jingkieng Umïam ka la buh ïa ka jingeh kaba khraw ïa ki paidbah nongleit nongwan. Ka jingeh ka la nang jur shuh shuh namar ka jingñiah khlemakor jong ki paidbah ïa ki kali kiba shu ïaknieh ban ïaid kloi ïa kiwei pat ki kali kiba ïaid nakhmat jong ki.
Kiba bun ki nongñiah kali ki la ujor ïa kane ka rukom leh jong kiba bun ki nongñiah kali kiba la shu ñiah kali khlemakor tang ban myntoi ïalade, khlem da burom shuh ïa kiwei pat kiba la ïeng ha u laiñ ban ïaid na kane ka surok kaba khapngiah namar ka jingmaramot ïa ka jingkieng ha pung Umïam.
“Dei kane ka jingleh jong ki nongñiah kali kiba khlem pyrkhat shuh ïa kiwei pat kiba la ap bad ïeng laiñ da ka lynti kaba dei”, la ong ki katto katne ki nongñiah kali ba ïaid lyngba ka jingkieng Umïam.
Ha kajuh ka por, ka tnat Pulit jong ka East Khasi Hills District lyngba u Superintendent of Police (City), Bah Vivek Syiem, ka la maham tyngeh ïa kino kino ki kali kiba ïaknieh ïaid ha jingkieng Umïam kin ngat ha ka jingshah pynshitom katkum ki kyndon jong ka aiñ.
U SP (City) u la pyntip sha ki paidbah ba ka jingmaramot ïa ka jingkieng Umïam ka dang ïaid shakhmat bad ïa ki kali la ailad ban ïaid na baroh ar liang (One Way). Hynrei, la lap ba ki don katto katne ki kali kiba ïaknieh ban ïaid shakhmat ynda poi ha jingkieng Umïam kat haduh ba ka la wanrah shuh shuh ïa ka jingdheng kali kaba pynsuhsat ïa ki nongleit nongwan.
“Khnang ban pynthikna ïa ka jingïaid beit jong ki kali, la kyrpad ïa ki nongñiah kali ba kim dei ban ïaknieh ïaid shakhmat. Kino kino kiba pynkheiñ ïa kane ka jingbthah kin shah pynshitom katkum ki kyndon jong ka aiñ. Shuh shuh, ban pynkylluid ïa ka leit ka wan jong ki kali lyngba ka jingkieng Umïam, la kyrpad ïa ki nongñiah kali ba kin ïaid ruh na surok Shillong By-pass,” la ong u SP (City).
