Khliehriat, K’lyngkot, 02: Kawei ka longkmie kaba la tip kyrteng kum ka Kong Lita Ryngkhlem la kynnoh ba ka la shah pynïap dusmon ha uwei u runar uba la tip kyrteng kum u Monkiru Chyrmang, uba la 29 snem ka rta, bad uba ju khot sin kum u Swet.
Ïa ka met ïap jong ka Kong Lita la lap ha ka 31 tarik, Nohprah, 2023 na kawei ka jaka ba long khlaw kaba hap ha shnong Mookhep bad kane ka longkmie ka la jah na la ïing naduh ka 25 tarik, Nohprah 2023.
Ka khubor ba la ïoh lum ka ïathuh ba ïa u Monkiru Chyrmang la ïohkem hynnin ka Lah Sngi u Blei ha ka por janmiet da ki dkhot ka Village Defence Party (VDP) Mookhep bad ki dkhot jong ka Jaiñtia Student’s Movement (JSM) ha kaba ki la lap ïa u katba u dang tim sih tim sang hapoh shnong.
Ïa u Monkiru Chyrmang la aiti noh sha ki Pulit jong ka Ladrymbai Outpost da ki dkhot ka VDP, ka Dorbar Shnong Mookhep bad ka JSM.
Ki Pulit kiba la pynlong ïa ka jingtohkit ïa u Monkiru Chyrmang, u la phla ruh ba u dei ma u uba la pynïap ïa ka Kong Lita ha kawei ka jaka ba long khlaw da kaba shu ksih na u ryndang.
U la phla ruh ba um shym la mut ban pynïap bad hadien ba ladep ksih u la phet noh na katei ka jaka khlem da tip ruh ba ka Kong Lita ka la ïap tat haduh ba un da ïohi lyngba ki lad pathai khubor.
Ki dkhot jong ka JSM Eastern Region bad ka JSM Wapung Unit, hadien ba la lap ïa ka met jong ka Kong Lita, ryngkat lang bad ki VDP ka shnong Mookhep bad ka Dorbar Shnong Mookhep ki la pyrshang bad wad bad buddien halor kane ka jingjia.
U President ka JSM Eastern Region, u samlaWellson RD Siangshai u la ïathuh ba ki dkhot ka seng na Eastern Region bad ka Wapung Unit hadien ba la ïoh jingtip halor ka jingjahrngai jong ka Kong Lita na ka Shnong Wapung Shnong naduh ka 25 tarik, Nohprah 2023 bad lap pat ïa ka metïap jong ka na shnong Mookhep ha ka 31 tarik Nohprah, 2023 ka la pynbitar ïa ka seng namarba kane ka jingjia ka ju ïai jia na ka por sha ka por kat haduh ba ki kynthei bad ki khynnah ki shah thombor ha ki riew thrangsnam, ki riewbymman kiba shu pynïap dusmon ïa ka mynsiem briew khlem da don shuh ka mynsiem ïatip lem para briew.
U President ka JSM Wapung Unit, u samla Kerbhame Dkhar, u la ong ba ka seng ka la dawa ruh ïa ki bor jong ka ain ban pynshitom bad ai jingpynsajia ïa u runar da kaba sdien Phasi khnang ba kum kine ki jingjia kin nym jia shuh nangne shakhmat.
