Duna bha kiba ieit ïa ki sim, lap ki Scientist ba bun bha ki sim phylla ha thaiñ Sohra

Shillong, K’Lyngkot 02 : Ka kynhun jong ki lai ngut ki scientist ba wad bniah shaphang ki mrad khlaw bad ki sim ki doh ba kynthup ïa u Arpit Deomurari, Steve bad Gaurav Kataria ki la lap ba ki don bun jait bha ki sim ba phylla khamtam ha ki bynta jong ka Mawkdok, Mawphlang bad ki thain Sohra.
Kine ki sim rit ba kham phylla kiba ju shem tang ha ki bynta jong ka Myanmar, Thailand bad China kidei kiba la tip kum ki Tawny Breasted Wren Babbler.
Kitei ki scientist ki lap ruh ba don haduh 120 tylli ki jait sim ha ka sorbe ba ki pynlong ha ki thaiñ Sohra.
Haba kren bad ki lad pathai khubor u Director ka Meghalaya Tourism Development Corporation (MTDC), Bah Allan West Kharkongor u la ong ba ki la trei borbah ban pynsngewthuh ïa ki paidbah ban sumar bad pynneh oynsah ïa ki sim ki doh kiba don kyrhai ha ka jylla.
Na ka liang u Gaurav Kataria ba dei u nongseng jong ka Premium Bird Tour Company-India Birding Tour u la ong ba ka Meghalaya ka don bun bha ka lad ban pynpawnam ha ka jingdon ki jait sim. U ong ruh ba donkam ia ka sorkar jylla ba kan kyrshan lang khnang ba kin lah ban leh kumba maitphang da ka Arunachal Pradesh.
“Na ka bynta kito kiba sngewtynnad ban peit ïa ki sim ki doh haba ki wan hangne ki lap ba ym don ei ei, ym don kino kino ki jingtip bad ym don ruh ki nongïalam ban ïalam ïa ki nongwan sha kito ki jaka don ki skim. Hynrei haba phi leit sha Arunachal Pradesh, ka don kata ka jingkhring ïa ki nongwan kai tang ban leit peit ïa ki skim bad kane ka pynlong ïa katei ka jylla ban kamai da ki million dollar ha ka shisnem,” ong u u Gaurav Kataria.
Da kaba pynpaw ba kane kadei ka sien wan kaba hynñiew sha Meghalaya bad ka jingwan ha ka 01tarik Kyllalyngkot ki la leit sha ka jaka ba tip k um ka wah Lyngksiar ha Sohra, kum ka kynhun ki la lap ïa kitei ki jait sim ba kham phylla.
U la ong ruh ba watla ym don ba ïalam ïa ki ban leit peit ïa ki sim, hynrei ha ka jingwan jong ki sha ka jylla ki la lap pat ba ki don haduh 120 tylli ki jait sim ha ka jylla.
Haba bynrap lang, u Steve uba dei u stad wad bniah ïa ki sim ki doh ki mrad ki mreng ha United States u la ong ba ka jingleit peit kai ïa ki skim ka la kiew stet bha ha katei ka ri bad ha pyrthei hi baroh kawei.
Katba na ka liang u Dr. Arpit Deomurari, uwei na ki nongwad bniah ba la tbit bha ha katei ka lain u la ong ban wan khnang sha Meghalaya na ka bynta lai haduh san sngi tang ban ïohi ïa iwei i sim kam ïahap dor shuh.
U ong ruh ba katkum ka jingwad bniah jong u, na ka daw ka jingkylla ka mariang, bun jait ki skim kiba ju im ha ki khappud jong ka ri ki la kiew noh shaneng.
“Dei na kane ka daw ngi la ïohi kham bun jait ki skim kiba ym pat ju kham lap ha India,” u la ong.