Shillong, K’Lyngkot 02 : U MLA ka Sohra, Bah Gavin Mylliem ha ka sngi Ba-ar u la ong ba ka jingbyrthen jong ka seng HNLC ïa u halor ka MCCL kadei ka bym don nongrim ei ei khamtam eh haba ïadei bad ka jingkdew kti ïa u shimet halor ka rai jong ka sorkar jylla ban khang noh ïa katei ka karkhana dewbilat bad ai VRS ïa ki nongtrei.
Haba kren bad ki lad pathai khubor ha ophis treikam jong u, une u MLA ka Sohra u la bynrap biang da kaba ong, “Nga shim ba kane ka jingbyrthen kadei ka bym don nongrim satia. Nga kyntu jur ïa ki ba kim dei ban pynmih kum kine ki jingthoh ba khlem nongrim.”
Shuh shuh u ong ruh ba u kwah ban pynsngewthuh ïa ka seng ba kim don hok ban kynnoh shimet ïa u namarba ka rai jong ka sorkar kadei ka rai jong baroh lang.
U Bah Gavin u la ïathuh bniah ruh ïa ka jingïaid lynti jong ka MCCL khamtam naduh u snem 1989 -90 haduh u snem 2006 -07 ha kaba ka jingkamai ka shu ïohnong beit bad ka khlem shah ram hangno hangno ruh.
U ong ba ka la paw kum kawei na ki kompeni ka bym shah ram hangno hangno ruh. U la ïathuh ba ha kitei ki snem ka MCCL kam shym la donkam satia kino kino ki jingïarap na ka sorkar.
Tangba, u ong pat ba ki bor pynïaid ha u snem 2005 ki la pynpaw ba ka la don ka jingthut ha ka jingtreikam namarba ka la rim palat bad kumta ki la pynpaw sha ka sorkar ban kylla noh sha ka ‘dry process’. La ïathuh ba ïa kane ka sorkar ka la ai ka jingmynjur ha u snem 2006 ban sdang noh ïa ka dry process.
“Katkum ka thong la buh ban pyndep noh shisnem shiteng kata ha shwa ban kut u 2007. Hynrei sngewthuh ba kane ka dry process ba 85 klur ka khlem lah ban pyndep ha ka por ba la buh bad ka la dep hadien 9 snem, kata haduh u snem 2016,” u la ïathuh shuh shuh.
Ban pynshai shuh shuh, u Bah Gavin u la ïathuh ruh ba ka jingslem ban pyndep ka la pynlong ruh ïa ka dor trei ban nang kiew bad kynjoh haduh 143 klur tyngka, ka jingkiew kaba la bun na ka jingmang ba ka sorkar jylla ka la buh.
U la ong ba ka jingslem kane ka plant thymmai ka la pynlong ïa ka MCCL ban sah bun bha ka ram ban siew sha ki contractor bad ruh sha ki supplier.
U Bah Gavin u la ïathuh ba katkum ka thong jong ka dry process, ka MCCL ka buh thong ban pynmih haduh 600 ton ha ka shisngi bad lehse da kaba lah ban pynmih katne kin lah ban pyndep ïa ka ram ba bun.
La ïathuh ruh ba hadien u 2016 la sdang ban pyntrei bad dei haduh u snem 2020 shwa ka khlam COVID ka jingpynmih ka long tang 5000 MT bad kam kot satia sha ka 15000 ton ha ka shi bnai lane 600 ton ha ka shisngi. U ong ruh ba kane ka la ktah haduh katta katta namar tang ka tulop nongtrei ruh ym dap shuh ban siew.
“Kumta la shu ïai pan shu ïa pan na ka sorkar jylla bad hadien kane sa shisnem tam la ktah sa ka khlam COVID kaba la hap ban sangeh treikam kumba shi snem tam. Hadien ba la hïar ka khlam COVID na ka liang ki bor pynïaid ki la thmu ban plie biang hynrei la sngewthuh ba shisien ba la sangeh treikam shisnem tam ki tiar ki tar la hap ban bujli nalor ba ka pla tyngka jong ka MCCL kam long kaba biang,” u la bynrap biang
Kumta, la ïathuh ba la thoh biang sha ka sorkar jylla ban phah wad bniah biang kumno ban lap ïa ki lad ki lynti ban pynkhie im biang ïa ka. Une u nongmihkhmat u la ong ba ka sorkar jylla na ka por sha ka por ka ïai bteng ban theh pisa hynrei ki dak kiba paw pat ki pyni ba kam lah ban seisoh.
U ong ruh ba dei halor kitei ki nongrim ba ka sorkar ka la khot ïa kren halor ki lai tylli ki mat, kata ba donkam haduh 188 klur ka hap ban bei na ka bynta ban pynïaid beit ïa katei ka karkhana dewbilat. Nangta ban leh ïa ka Joint Venture bad ki private company bad ka mat kaba lai pat ka long ban khang dam bad ai VRS ïa ki nongtrei bad ban pynkhuid lut ïa ki ram ki shah.
“Kumta, ban theh tyngka biang sa 188 klur ha MCCL kum nongmihkhmat ngi sngewkhia haduh katta katta namar 15 snem ba la dep ka sorkar ka la theh haduh 350 klur tyngka kata ruh khlem seisoh,” u la ong bad bynrap ba lada ki theh sa 188 klur tyngka ruh kim pat tikna la ka la lah neem ban ïeng hi dalade.
U ong ruh ba lada ïaid da ka mat kaba ar (option 2) kata ban rai treilang noh bad ki kompeni shimet ha kaba ha u 2021 la khot ïa ka Expression of Interest (EOI) ha kaba ki don lai tylli ki kompeni. Hynrei kaba shah jied pat haduh mynta u ong ba kim pat phah lut ïa ki kot sla sha ka MCCL.
“Tangba na ka sorkar jylla pat haduh mynta kam pat shim ïa ka rai kaba khatduh kumno ban leh nangne shakhmat.”
U la batai pat ba ka mat kaba lai ka long ba ka sorkar ka hap ban khang dam bad ai noh da ka VRS ïa ki nongtrei baroh.
“Ki dei ruh ban tip ba ki nongtrei ka MCCL ha ka 28tarik Jylliew, 2023 ki la ai da ka shithi sha ki bor pynïaid ba ki long kiba kloi ban kren halor ki kyndon haba ïadei bad ka VRS bad ruh halor ka Golden Handshake ym ban shu kynnoh ba la shu pynbor ka sorkar,” u la bynrap biang.
Kumta u ong ba ka long kaba sngewsih ba ka HNLC ka la shu byrthen ïa u shimet bad kynnoh artad ba u dei u nongshet kylla.
U Bah Gavin u la ïai ban biang ruh ba hap ban pyrkhat arsien ba yn pynlut haduh 188 klur ha ka plant kaba ym tikna ba kan ïeng dalade. Nalorkata, u ong ruh ba ki 250 tylli ki longiing kiba imja na ka MCCL kim dei satia tang na Sohra constituency hynrei dei ruh na Shella tangba ma u kum u nongmihkhmat paidbah u ïeng ban ïasaid wat ha Ïing Dorbar kyllum lang na bynta baroh.
Kumta, u la ong ban shu kdew kti ka long kaba suk hynrei ynda la poi ha ka shuki kam dei satia ka kam kaba suk ban rai namar ban rai dei uba bun balang. “Namar shwa ba ngin kyrpad ïa ka sorkar ngi hap ban pyrkhat ruh ïa u paidbah uba bun,” u la ong.
Haba kren pat halor ka jingdawa jong ka HNLC ban phah hiar shuki ïa u kum u MLA ka Sohra, u Bah Gavin u la ong ba u la wan sha ka jingshakri paidbah da ka mynsiem ban shakri. Da kaba kam ba kum u briew u lah ban don ki jingbakla hangne hangtai hynrei katei ka jingbyrngem jong ka HNLC patg ka la nang pynrhem ïa ka mynsiem ban shakri khambha shuh shuh da ka jingngeit ba ha ka jingshakri jong u, u Blei un don ryngkat ban ïada ïa u.
Shuh shuh u ong ba ka HNLC kadei ban da tip ïa kum kitei ki jingshisha baroh kiba u la pynpaw baroh ïoh lehse kam pat tip halor kine baroh.
Haba jubab pat halor ka jingtyrwa jong ka HNLC ïa ki nongtrei ka MCCL, na ka liang utei u MLA Sohra u la ong ba ki paidbah mynta kim dei shuh kiba biej bad kum kin ym shah ïalam bakla.
