Jowai, Jymmang 12: Ka Hill’s Farmer Union, West Jaiñtia Hills District ka khot bad kyrpad ia baroh ki nongrep jong ka District kiba kynthup na baroh lai tylli ki Block (Thadlaskeiñ, Amlarem bad Laskeiñ) ban ïa leit lang sha ka jingïalang paidbah jong ki nongrep ka ban long ha ka 13 tarik u Jymmang, 2022 ha Madan Malki Shillong, East Khasi Hills District.
Ïa ka prokram ha kane ka sngi kan sdang naduh ka por 10:30 mynstep bad kan dei ruh ka sngi ba ki nongep na baroh kawei ka jylla kin ïa kynduh lang ban ïa kren bad pyrkhat ïa ki jingeh ba ki nongrep ki ïakynduh.
Ki mat ba ka Hill’s Farmer Union West Jaiñtia Hills Unit ka don ban pynsngew sha ka Sorkar Meghalaya lyngba kane ka jingïalang paidbah ka long ban pynbiang ïa ki jingdonkam jong ki nongrep kum ki Symbai, ka Sboh, Pynpoi um sha ki jaka rep.
Kumjuh ruh ban pynbiang ïa ka ïew ka hat ban pynsuk ïa ki nongrep, ban pynduh ïa ka Jingot kilo ha ïew ha hat, ban pynkhlaiñ ïa ka tnat ri Jingri kum ka kam Ri sniang, Ri syiar, Ri Masi Ri Dohkha bad kiwei, ban pynbun ïa ki Scientist ba dei peit ïa ka rep ka Riang ban lait naka jingbam duh ki khñiang ïa ki jingthung, ban pynbiang ïa ki Surok bad lynti syngkien sha ki jaka rep, ban pynkloi ïa ki lad jingiarap sha ki nongrep ha ba pynjulor ka mariang bad kiwei kiwei de.
“Ka jingïatylli ka long ka bor” kumta ka seng lyngba une u kyrwoh na u bah Mutshwa Thabah president HFU-WJH ka kyrpad ïa baroh ki nongrep ban pyllait por khnang ban wan khlempep sha kane ka jingïalang, khnangba ki jingdawa ba ka seng ka la buh haneng kin long ki ba sei soh ïa ki nongrep ha ka jylla baroh kawei.
