Khliehriat ïaïong 12: Ka Balang Presbyterian Sutnga, East Jaiñtia Hills District, ka khot ka wer sngewbha ïa baroh ki parabangeit sha ka Jingïaseng jong ka Khasi Jaiñtia Presbyterian Assembly (KJPA) kaba Khadwei ka ban long ha kane ka Balang naduh ka 13 haduh ka16 tarik Ïaïong 2023.
Mynta na ka liang ka Balang ka la nang ïai pynkhreh shaid shaid ha kaba ïadei bad kane ka Jingïaseng Assembly.
Ki jingtip ba donkam kiba ïadei bad kane ka jingïaseng ka long; Ka jingpdiang sngewbha ïa ki Dkhot bad Delegate ha ka 13 tarik kan long ha Skul jong ka Sutnga Presbyterian Higher Secondary School kaba don marpyrshah bad ka Madan Football jong ka Shnong Sutnga, kaba yn pynlong ruh ïa ki Jingïaseng paidbah jong ka Assembly ha ka Sngi U Trai ha kane kajuh ka madan.
Ka jingpynbeit ha kaba ïadei bad ki kali kiba wan sha kane ka jingïaseng ha ka sngi U Trai, kata ha ka 16 ka long; Ki kali kiba wan sha kane ka jingiaseng, naduh ki kali rit bad kali heh, kin sngewbha ban bud katkum ka jingpynïaid jong ka Traffic Cell. Ka Balang ka khlem buh ïa ki Car Pass namar ba ki Parking baroh ki jan na ka jaka pynlong jingïaseng.
Ki nongkren ha katei ka sngi U Trai ki long – ha ka por 10.30AM, yn sam ïa ka ktien u Blei da u Rev.A.L.Laskor bad 1.30PM u Rev.G.P.L. Gadew ryngkat ki Choir na ki Balang jong ka KJP Synod Mihngi bad Sepngi
Na ka liang ka Balang ka kitbok kitrwiang ïa baroh ki nongwan sha ka jingiaseng Assembly naduh ki Dkhot bad Delegate haduh kiba wan ha ka Sngi U Trai, ba U Blei ka Jingsuk Un ïalam bad btin ha ki lynti syngkien ba kin poi suk sha ka Balang jong ngi khlem kino kino ki jingpynwit. Kane ka long katkum ka kyrwoh ba la phah da U T.Bn.E.Gympad, Secretary ka Balang Presbyterian Sutnga.
