Shillong, Ïaïong, 12: Ka kynhun ki nongïalam niam jong ka North East India kiba don hapoh ka shatri jong ka United Christian Forum of NEI (UCFNEI) ha ka sngi Balang ka la pynpaw ïa ka jingkyndit bad ka jingsngewkhia hadien ba ki arngut ki nongïalam niam na ka jylla Meghalaya kiba dei na ka Balang Presbyterian la kynnoh ba ki la shah khang kdong bad shah pharep ba ki donkti ban pynkylla niam jubor katba ki dang leit jngoh ïa ka lyngkha trei ha Bihar watla ki la ïoh ïa ka jingkhot sngewbha jong ka Balang ban ïashim bynta ha ka jinglehniam hadien ka Easter bad ki paidriewngeit.
Katkum u kyrwoh ba la phah da u Superintendent of Police jong ka East Khasi Hills District u la ïathuh ba kine ki arngut ki nongïalam niam ki don hapdeng ka jingshngaiñ bad ki la ïoh jingïada na ki bor Pulit shwa ban wan phai noh sha la ing, ong u Nongaiktien jong ka UCFNEI u Allen Brooks ha u kyrwoh ba la phah sha ki lad pathai khubor.
Ha kawei pat ka liang, ki nongïalam niam ki la pynpaw ïa ka jingsngewsih bad ka jingkthang mynsiem halor ka jingshah pynpra jong ki lai tylli ki ingmane ha East Manipur District tang hadien ka lehniam Easter ha kaba ki bor synshar ki la pyntreikam ïa ka jingbthah jong ka Ingbishar Manipur High Court.
Halor kine ki jingjia, ka UNCFNEI ka la kyrpad ïa ki paidriewngeit ba kin ïai bteng ban pynlong ïa ki jingduwai na ka jingsuk bad ka shongsuk shongsaiñ da ka jingïatylli lang kawei, ong u Brooks.
