Shillong, Ïaiong 12 : Ka sorkar jylla hynne ka sngi ka la lum ïa baroh ki heh sorkar na ki tnad bapher bapher ban ïa kren halor ka jingpynkhreh na bynta ka G20 kaba ki nongïalam na ki bun tylli ki ri jong ka pyrthei kin wan ha nongbah Shillong ban wan shim bynta ha katei ka jingïalang kaba heh bha naduh ka 15tarik mynta u bnai.
Haba kren bad ki lad pathai khubor hadien ka jingïalang, u Symbud Myntri Rangbah ka jylla, Bah Prestone Tynsong u la ïathuh ruh ba ki mat ba ïa kren halor katei ka sngi ki kynthup ruh kumno ban weng ïa ka dheng kali, nangta ka jingshngaiñ nalor kiwei kiwei pat ki bynta ha kaba la aiti ha ki tnad ba kin leh ïa kaba donkam.
“Kin don haduh kumba 120 ngut ei ei ki kynrem ki lyndan (VVIP) kiban wan shim bynta ha katei ka G20,” la bynrap shuh shuh u Symbud Myntri Rangbah.
Katkum ka jingong jong u, ka jingpynkhreh mynta ka la ïaid shakhmat bad kumta ki khmih lynti ruh ba shwa ka por yn sa leh ban pyndep pura noh.
Nalorkata, u Bah Prestone u la ïathuh ruh ba ki la ïakren ruh wat haba ïadei bad ka jingshngaiñ namar ki kwah ba kitei ki nongïalam na kiwei ki Ri ynda ki poi ha Shillong kin kmen bad kin sah kynmaw ïa ka jingwan jong ki sha Meghalaya.
