Ka Sorkar ka donkti ban khaïi dewïong be-aiñ, ong ka ïingbishar HC

By Mawphor News Desk On Apr 13, 2023

FILE PHOTO: Labourers work at a coal stockyard in East Jaintia Hills in Meghalaya, India, September 16, 2015. . REUTERS/Krishna N. Das

Shillong, Iaiong 12 : Ka ïing bishar High Court jongka jylla ha ka jingpynmih hukum ha ka Sngi Ba Ar halor ka mukotduma PIL ka la ther tyngeh ïa ka sorkar da kaba kynnoh beit ba ka jingbym lah jong ka sorkar ban kem ïa ki trok kit palat pud ka pynpaw shai kdar ba ka sorkar ruh ka ïadonkti ha ki kam tih bad khaïi dewiong beaiñ bad kane ka long ka jingpynkheiñ bad jingbym burom ïa ka hukum jong ka ïing bishar Supreme Court.
Haba bishar ïa kane ka mukotduma PIL ka Division Bench ka la ong “ Ki don kiwei kiwei ki kam kiba ïadei bad kane ka jingtih bad khaïi dewiong beaiñ ïa u dewiong bad kane ka jingbym lah ban kem ne bat ïa ki trok ba kit palat pud ka kdew shai kdar ba ka sorkar ka ïadon kti lang ha kane ka kam beaiñ bad kane ka long ka jingpynkheiñ bad jingbym burom ïa ka hukum jongka ïing bishar Supreme Court”.
ïa kane ka PIL la ujor da Champer M Sangma. Ka ïing bishar ka la ong ba kito kiba pynkheiñ ruh ki khlem shah kem satia bad kane ka la pynlong ïa ka ïing bishar ban rai hi ba donkam ïa ki bor pahara ka sorkar pdeng (Central Armed Police Forces) ban tehlakam ïa kane ka kam.
“ Yn ym don ka jingtih beaiñ ïa u dewiong lada ym don ka jingkhaïi beaiñ bad ka long kaba suk ïa ki pulit ban bat ne kem ïa ki trok kiba kit beaiñ ïa u dewiong ha surok bad kem ïa kiba donkti lada dei shisha ba shim khia da ka sorkar” ong ka ïing bishar.
Ka ïing bishar ka la pynpaw ruh ba i kumba ki don bun ki briew kiba shim kabu ïa kane ka kam beaiñ namar ïa uto u dewiong ba la tih beaiñ mynta la shu lum thup ha ki bun jaka da ka hukum jongka ïing bishar SC. Ka sorkar ka la shim khia ruh ba ailad ba ïa uto u dewiong ba la tih mynshwa tad haduh u snem 2016 ban pynïaid ïew noh.
Hynrei wat hadien kata ruh u dewiong uba dang shu dep tih u ïai mih bad lum thup beit ha ki jaka ba ïohi paidbah bad ka sorkar ka ïai kren na ka por sha ka por ba uto u dewiong u lah ban dei uto uba la tih naduh mynshwa.
Ka jingtih dewiong ka ïai bteng beit mynsngi mynshai bad la ïohi lut da baroh bad kane kan dang ïai bteng beit da kane ka jingbym shim khia jongka sorkar ïa ka hukum jongka ïing bishar bad kiwei kiwei ki hukum naduh u snem 2016. Shuh shuh ka ïing bishar ka la ong ruh ba imat la don sa ki buit thymmai ba la pyntreikam namar uba bun u dewiong la khaïi lyngba ka Gasuapara ryngkat bad u dewiong uba wanrah na shabar jylla.Kumta uba bun u dewiong ba la shalan lyngba ka Gasuapara LCS u dei uba la tih beaiñ hapoh ka jylla.