Hiar jurip u Majistor ïa ka jaka ksam marpoh khyndew ka Kompeni ha thaiñ Rambrai

Nongstoiñ, Ïaïong, 12: Ka jingleit ïakynduh jong ki nongïalam ka FKJGP Rambrai circle ïa u Deputy Commissioner ka West Khasi Hills ha ka sngi hat majai ka 11 tarik ban pan jingshai ha kaba ïadei bad ka jingsdang ban ksam marpohkhyndew ha Mawlangria, ka jaka kaba don hajan ka shnong Mawïawtep, kaba jngai kumba ar kilomitar na ka surok Rambrai Mawdoh, ka la long kaba seisoh, namar ha ka sngi ba bud kata ha ka sngi balang ka 12 tarik u Deputy Commissioner, u la phah ïa u bah D.Marweiñ MCS ban leit sha katei ka jaka ban jurip bad ban wan ai jingtip hapoh ka ophis jong u.
Ha katei ka jingleit jurip jong utei u majistor la synran lang da ki dkhot ka FKJGP Rambrai circle haduh katei ka jaka, ha kaba la lap ba ki mashin ban pyndonkam ha kaba ksam shapoh ramew ki la don ar tylli, nangta kawei ka puh shilum, ki tiar ki tar kum ki pipe nar na ka bynta ban pyndonkam ha kaba pynngam shapoh khyndew.
Haba la poi ha katei ka jaka la khot ïa u nongñiah jong ka puh shilum bad la kylli ïa u ba dei mano ba pyntrei ha katei ka jaka, ha kaba u la ong ba um tip namar u dei tang u nongñiah ïa katei ka puh shilum kaba dei trai da uwei u briew na Nongstoiñ.
Katba u Majistor u dang ïakren bad utei u briew la wan poi sa kiwei pat ki briew kiba dei ki nongpeit nongkhmih ïa katei ka jingtrei. Haba la kylli na ki, ki la ïathuh ba u ba pyntrei ïa katei ka jingksam marpoh khyndew u dei na Rambrai bad ka jingtrei ka dei na ka bynta ban ksam ïa u maw magnet (iron ore). Namar ba kim da lah bha ban pynshai, na ka liang u Majistor u la bthah ïa ki ba ki dei ban sangeh shuwa shipor haduh ba ki bor pynïaid District kin da pyntip da kumwei pat.
Ha kaba ïadei bad katei ka jingksam marpoh khyndew ha katei ka jaka, na ka liang ki paitbah jong ka shnong Mawmluh II bad Mawliehpoh, ki la pynpaw ïa ka jingpyrshah kaba jur halor katei ka jingthmu ban ksam marpoh khyndew na katei ka jaka.
U bah P.K.Rngaid uwei na ki riew rangbah na ka shnong Mawmluh II haba ïakren bad u nongthoh khubor u la ong ba ïa ka umbam um dih ha kitei ki ar tylli ki shnong kiba la don phra phew tam ki longïing la ring na ka tyllong um kaba mih na katei ka jaka bad lada ksam marpoh khyndew ka lah ban ktah shibun ïa ka koit ka khiah jong ki paitbah shnong.
Nalor kata u la ong ba haduh lano lano kitei ki shnong kin ym shah satia ba tang namar ka jingksam mar poh khyndew na katei ka jaka, ki paitbah shnong kin duh ïa ka um bam umdih kaba khuid.
“Kum ban pynkynmaw ba naduh ki snem kiba mynshuwa eh la sdang ban ksam marpoh khyndew na katei ka jaka bad ki nongtrei ha katei ka jaka ki la shah beh noh. Ha kane ka kynti ka dei ka sien kaba ar ba katei ka jingwan ksam marpoh khyndew ka la sdang biang bad ha kaba ïadei bad ka jingsdang ban ksam biang, ban shu shaniah tang ha ki bor pynïaid District kan ym lah ban long. Namar lada ïa ka jingtih dewïong, tih maw tih shyiap la khang kumno yn shah ban ksam marpoh khyndew”, ong u Bah P.K Rngaid.
“Lada u nongpyntrei um lah ban pynbiang ïa ka mining license na ka sorkar pdeng, ki kot ki sla na ka Meghalaya State Pollution Control Board, na ka Forest & Environment, na ka Khasi Hills Autonomous District Council, Directorate of Mineral Resources bad kiwei kiwei ki tnad treikam, la sngewthuh shai ba ka jingpyntrei ban ksam marpoh khyndew ha katei ka jaka haduh mynta, kam dei da kino kino ki Company kum ka Geological Survey of India, ka UCIL, ka AMD bad kiwei kiwei hynrei ka dei kaba la leh da u riew shimet”, u la ong.