Shillong, Iaiong 12 : U Symbud Myntri Rangbah ka Jylla u bah Prestone Tynsong mynta ka sngi Balang, ula pyntip ba ka Sorkar ka la bthah ïa ka Bor Pulit ba kin pynthikna ba ka jingkhaïi tuh ne beain ïa u dewiong dei ban sangeh mardor noh hapoh ka Jylla.
“Kino kino kiba kit beaiñ ïa u dewiong , kin shah kurup bad kin shah pynngat ha ki kyndon aiñ” ong u Bah Prestone haba ïakren bad ki nongthoh khubor haba jubab ïa ka jingkylli halor kane ka kam.
Ha ka sngi Ba-ar, ka ïing bishar High Court jong ka jylla ka la ong ba ka jingbym lah ban talasi ïa ki trok ba kit palat pud ka kdew sha ka Sorkar Jylla ka ïadon kti lang ha ka jingtih bad khaïi tuh ïa u dewiong kaba long ka jingbym burom ne niewkor ïa ki hukum jong ka Iingkashari Supreme Court.
Haba shong bishar ïa ka PIL, ka Division Bench kala ong “Ki don bun ki kam ba ïadei bad ka jingkhaïi tuh ïa u dewiong, ka jingbym lah jong ka Sorkar ban tehlakam ïa ki kali ba kit palat pud bad kiwei kiwei, baroh ka thew sha ka Sorkar Jylla kum kaba don bynta lang ha ka jingtih beaiñ bad khaïi ïa u dewiong kaba long ka jingbym ñiew kor ïa ka hukum ba la pynmih da ka ïing bishar Supreme Court”.
Ia kane ka PIL la mudui da uwei u nongshongshnong ka Ri-lum Garo u Champer M Sangma.
