3 sien ïasaid ka Sorkar ha ïing bishar ban ym kyrtiang dien ban pyntreikam ïa ka Roster System
Shillong, Iaiong 12 : U Symbud Myntri Rangbah ka Jylla u Bah Prestone Tynsong mynta ka sngi Balang ula ong ba ka Sorkar Jylla ka la ïasaid hakhmat ka ïing bishar High Court ban ym kyrtiang dien ban pyntreikam ïa ka Roster System hynrei ba kan shah ha kaban pyntreikam ïa ka Roster System naduh nangne shakhmat (Prospectively). haduh lai sien lai wat hynrei ka ïing bishar ka ban jur beit ban pyntreikam beit naduh ba sdang ban pyntrei ïa ka Reservation Policy.
“Hadien ba ka ïing bishar ka la pynmih ïa ka hukum ha u 2022, ngi la file ïa ka affidavit (halor kane ka kam) ym duna ïa ka lai sien ha kaba ngi la ïasaid bad ka ïing bishar ba kan shah ïa ngi (Sorkar) ba ngin pyntreikam ïa ka Roster System naduh nangne shakhmat ym naduh ki snem ba la leit noh ym bsn kytiang dien naduh u 1972” ong u Bah Prestone haba ïakren bad ki nongthoh khubor.
“Hynrei ka ïing bishar ha katei ka por ka la ban jur ïa ngi ba ngi dei ban pyntreikam naduh ki snem ba la leit noh kata naduh ba sdang pyntreikam ïa ka State Reservation Policy” ula ong haba jubab ïa ka jingkylli ba ïadei bad ka jingdawa jong ka Voice of the People Party ban pynsangeh shuwa ïa ka jingtreikam jong ka Roster System katba ym pat lah ban pynbeit janai ïa ka State Reservation Policy.
U Bah Prestone u pyntip ba shen ka Sorkar kan sa khot ïa ka jingialang jong ka Kynhun Myntri bad ka jingïalang jong baroh ki seng saiñ pyrthei na ka bynta ban ïakren halor ka Roster System.
“Ngi dang ap ïa u Myntri Rangbah ba un wan poi sha Shillong bad ngin sa khot ïa ka jingïalang. Ngin sa khot ïa ka jingïalang ka Kynhun Myntri bad kumjuh ruh jong baroh ki seng saiñ pyrthei bad baroh ki nongïalam kiba don ka jingkit khlieh bad ngin sa ïasyllok kumno ba ngin ïaid shakhmat” ula ong.
Haba kylli, u Symbud Myntri Rangbah ula ong “Ngam don hok ban jubab ha ka jaka jong ka ïing bishar High Court hynrei kaei kaba nga ong, ka mat ka la shai kdar ba ngi la dep ïasaid namar ngi kwah ban pyntreikam naduh nangne shakhmat hynrei ka ïing bishar ka la pynbor bad buh ha ka jingthoh ba dei ban pyntreikam naduh ba sdang treikam ka Reservation Policy. Namar kata, kumba ka long mynta hi kane ka sah kumne”.