Takraiñ ka HC ïa ka Sorkar bad tnat Pulit bym lah tehlakam ïa ka jingkhaïi dewïong be-aiñ

Kumno hap ka trok kit dewïong ha riat ha Ri-Bhoi?

0

Shillong, Lber 12: Ka ïing bishar Meghalaya High Court ar sngi lynter kata ha sngi Ba-ar jong ka 11 tarik Ïaïong bad ka sngi Balang ka 12 Tarik Ïaïong, ka la ther ïa ka sorkar jylla halor ka jingbym lah jong ka ban teh lakam ïa ka jingtih bad shalan be-aiñ ïa u dewïong bad ka jingïoh lad ban shalan be-aiñ wat hadien ba ka Supreme Court ka la khang ïa ka jingtih bad shalan dewïong ha ka jylla naduh u snem 2016.
Ha ka hukum kaba ka la pynmih mynta ka sngi haba shong bishar ïa ka mokotduma PIL ka Kashari jong ki laingut ki nongbishar ba kynthup ïa u Chief Justice ka Meghalaya High Court u Justice Sanjib Banerjee, Chief Justice, u Justice H. S. Thangkhiew, bad u Justice W. Diengdoh, ka High Court ka ong ba na ka liang ka sorkar ka kam ba ka la leh ïa kaba donkam ban khang ïa ka jingtih bad shalan dewïong be-aiñ bad ka la lah syndon ban khang sbak ïa ka jingshalan be-aiñ ïa u dewïong lyngba u nongsaid aiñ jong ka u Additional Advocate-General, ‘hynrei hynrei ka jingjia jong ka jingkylla ka trok kit dewïong ha Ri -Bhoi kaba la mih ha ki kot khubor ha ka sngi balang ka pyni da khongpong ïa ka jingkam ka sorkar jylla’ ong ka High Court.
Shuh shuh ka High Court ka kdew ba ka jingïai shalan dewïong be-aiñ bad ka jingïai bteng ban tih dewïong be-aiñ ka dang bteng wat haduh kine ki sngi ba mynta da kaba pynshong nongrim na kaei kaba la mih ha ki kot khubor ïa ka jingkylla ka trok kit dewïong, “Dei namar kata ka daw ka Kashari ka sngew ba ki pulit ka jylla kim lah satia ba teh lakam ïa kane ka kam be-aiñ,” kdew ka High Court ha ka rai bishar.
Shuh shuh ka High Court ka ong ba ka Supreme Court ka la hukum ban ban khang tih dewïong ha u 2016, ‘hynrei ka jingtih dewïong be-aiñ ha ka jylla ka bteng haduh kine ki sngi bad ka sorkar ruh ka ailad ba kine ïaid laitluid ki trok kit dewïong haduh ba ka jingshalan ruh ka long shaduh Bangladesh syndon da kaba thok ba u dei u dewïong ba wanrah na kiwei kiwei ki jylla” ong ka High Court.
Haba ïadei bad ka hukum jong ka High Court ban wanrah ïa 10 pyrton ki pulit Central Industrial Security Force (CISF) ban teh lakam ïa ka jingshalan dewïong be-aiñ ka high Court ka la ka la ïoh pdiang ïa ka jingpyntip na u Dr. Mozika uba dei u nongsaid aiñ ba mih khmat ïa ka sorkar India ne u Deputy Solicitor General of India ba ki pulit CISF ki la pynpaw ïa ka jingbym lah ban ai sha ka jylla ïa 10 pyrton kumba ka kashari ka pan na bynta ba kin peitngor khnang ban tehlakam ïa ka jingkhaïi dewïong be-aiñ namar kane ka kam kam dei hapoh ka jingpeit jong ki.
Na ka liang ka Kashari ka la kdew ba ha ki hukum bad ki rai bishar kiba la dep kam shym la kdew beit thik ba ki pulit CISF kin shimti ïa kane ka kam teh lakam ïa ka jingkhaïi dewïong be-aiñ hynrei ka la pyrshang ban twad jingmut la ban wanrah noh da ki pulit Central Reserve Police Force (CRPF) ban talasi ïa ka kam khaïi dewïong be-aiñ, hynrei ha ka kata ka por ka la mih ka jingkdew ba lada wanrah da ki pyrton CRPF kin hap treikam hapoh ka jingpynïaid ki pulit ka sorkar jylla bad ka Kashari kam kwah ba ki pulit sorkar jylla kin donkti lang ha kane ka kam talasi ïa ka jingkhaïi dewïong be-aiñ, na kata ka daw ka mih ka rai ka Kashari ban twad jingmut na ki pulit CISF la ki long ne em kiba la kloi ban wan sha ka jylla ban leh ïa kane ka kam talasi.
Shuh shuh ka Kashari ka la kdew ba namar ka la pynmih ïa ka hukum ban wanrah ïa ki pulit CISF hynrei ki pynpaw ïa ka jingbym lah ban shimti ïa kane ka kam hynrei ka hukum jong ka ka teh ïa kiwei pat ki kynhun pulit ban pyntreikam ïa ka hukum ka Kashari na kata ka daw ka tnad ki Kam Pohïing ka sorkar India lyngba u Union Home Secretary u ba dei ban pynthikna ïa ka jingpynpoi ïa 10 pyrton ki pulit Central Armed Police Force ban peit laitluid ne ryngkat lang ki ophisar jong ki pulit ka sorkar jylla ban peitngor ïa ka kam khaïi dewïong be-aiñ bad ban kem ïa kiba donkti.
Shuh shuh ka Kashari ka kdew ba namar ki pulit jong ka jylla kim lah satia bad kim don mon ban teh lakam ïa ka jingkhaïi dewïong be-aiñ na ka liang ka Kashari ka sngew dei ba ki pulit bym shah pynïaid ha ka sorkar jylla ban wan pyntreikam ïa ka hukum khang tih bad shalan dewïong be-aiñ ha ka jylla.
Ka Kashari ka kdew ruh ba kum ka 12th Interim Report ba la aiti da u Justice Katakey, ka kdew halor ka jingai lad ban lilam (auction) ïa u dewïong ba la dep tih, hynrei ka Kashari ka kdew ba ka don ruh ka jingpyrshang ban kynthup lang ïa ka dewïong ba dang shu dep tih thymmai kum ki dewïong ba la dep tih naduh ki snem ba kham mynshuwa ban ïoh die lang ha ka juh ka thup na kata ka daw kam don satia ka jingbat ïa ka por ba ka kdew ha ka kaiphot ban pyndep ïa ka jinglilam ïa udewiong ba la dep tih, ong ka High Court.
Shuh shuh ka High Court ka ong ba ka Supreme Court ka la hukum ban ban khang tih dewïong ha u 2016, ‘hynrei ka jingtih dewïong be-aiñ ha ka jylla ka bteng haduh kine ki sngi bad ka sorkar ruh ka ailad ba kine ïaid laitluid ki trok kit dewïong haduh ba ka jingshalan ruh ka long shaduh Bangladesh syndon da kaba thok ba u dei u dewïong ba wanrah na kiwei kiwei ki jaka,” ong ka High Court.

Leave A Reply

Your email address will not be published.