Ka Shillong ka dei ka nongbah ba ki samla pule na kiwei ki ri ki buh hakhmat ban wan pule: N. Munish Singh

Rakhe ka ICCR ïa ka jinglyngkhuh 74 snem

0

Shillong, Ïaïong 12: Ka Indian Council for Cultural Relations (ICCR) ha ka sngi Balang ka la rakhe ïa ka sngi sdang ba 74 snem jong ka ha kylleng ka ri, bad ha ka thaiñ shatei lam Mihngi ka jingrakhe ka long ha U Soso Tham Auditorium, Shillong.
Ha kane ka jingrakhe u Lat ka jylla, u Phagu Chauhan u la wan long kum u kongsan, ha ka jingsynran lang kiwei pat ki nongshah khot sngewbha ba kynthup ïa u Vice-Chancellor ka North-Eastern Hill University (NEHU) u Prof. Prabha Shankar Shukla, i Kong Silbi Passah bad kiwei kiwei ki nongshah khot sngewbha.
Haba kren ha kane ka sngi u Lat ka jylla u la ai jingïaroh ïa ka ICCR kaba la lah ban lum ban lang ïa ki samla pule na bar ri ban pyni ïa ki rukom im bad ka lariti sha kiwei pat kum ban pynïar ïa ka jingtip bad jingshemphang shapang kiwei pat ki ri bad ki kolshor tynrai ba ki wan.
Haba kren ha kane ka sngi halor ka phang “Indian Traditional Culture & its Cultural Exchange around the Globe”, u Dr B.D.R Tiwari, IAS, u la ong ba ki briew kiba na shabar Ri ki sngewphylla haba ki ïohsngew ba ki briew napoh kane ka jylla haba ki ai khublei, ki ju pynkham ne ai da u kwai bad u tympew ha ryngkat ka jingtah ïa ka shun kaba long ruh kum ka dak ka jingai sngewbha da ka jingieid kaba dei shibynta ka riti ka dustur jong ki briew napoh kane ka jylla.
U Dr B.D.R Tiwari, u la ong ba kum ki briew kiba im ha ka juk ka kor internet ka dei ka kamram ruh ban ïa kylliang ïa ki buit bad ki rukom im bad kiwei pat kiba ïapher ka riti dustur bad ka rukom im ban kham pynïajan ïa ka jingïadei bad ban kham pynïar ïa ka jingmut jong ngi.
La ïoh ïa ka jingkren plie ïa katei ka prokram da u N. Munish Singh, Zonal Director, ICCR (North East), ka jingshad na ki khynnah pule ka ICCR nabar ri, ka jingshad na ki samla pule ka jylla ba kynthup ïa ka shad pliang, ka jingshad Wangala bad ka Shad Mastieh.
Haba kren sha ki lad pathai khubor, u Zonal Director, ICCR (North East) u N Munish Singh ula ong ba la don haduh 8 haduh 9 hajar ngut ki samla kiba pule ha ki skulbah bapher bapher hapoh ka Ri India bad hapoh ka thaiñ shatei lam mihngi ki don palat 300 ngut ki khynnah kiba pule ha ki skulbah bapher bapher.
U la ong ba kine ki khynnah kiba na kiwei pat ki ri kiba wan pule ki dei kiba ka sorkar India ka bei tyngka lyngba ka Scholarship bapher bapher ba kin wan pule ha ka ri.
“Ka nongbah shillong ka dei ka jaka kaba ki samla pule na kiwei pat ki ri ki sngewtynnad tam bad ki bun bah kiba angnud ban wan pule ha Shillong namar ka jinglog ka jaka, ka jingdon ki jaka pule ba kynsai ba kynthup naduh ka NEHU, Indian Institute Of Management–Shillong, North Eastern Institute of Ayurveda & Homoeopathy (NEIAH), National Institute of Fashion Technology bad kiwei bad kiba bun ki briew hangne ki pliah bha ban kren ïa ka ktien English, ka jinglong jingman jong ka shnong ruh ka long kaba itynnad bad shngaiñ ki dei kine hi ki daw ba ki samla na kiwei pat ki ri ki,” u la ong.

Leave A Reply

Your email address will not be published.