Wer ïatreilang I Dr Ampareen ïa ki paralok MLA ban kyntiew ïa ki Kynthei ha Jylla

0

Shillong, Lber 06 : Ka MLA ka NPP na East Shillong I Dr Ampareen Lyngdoh mynta ka sngi nyngkong, ila kyntu ïa ki paralok MLA kynthei ba kim dei ban ailad ïa ka politik seng saiñ pyrthei ba kin pynïakhad ïa kaei kaba ïa angnud lang ban leh kata ban ïatrei lang na ka bynta ban kyntiew ïa ka kyrdan ki kynthei ha ka jylla.
“Ngim dei ban ailad ïa ka politik seng saiñ pyrthei ba kin pynïakhlad ïa kaei kaba ngi ïakwah eh bad ka thong ban kyntiew ïa ki Kynthei hapoh ka Jylla Meghalaya” ong I Dr Ampareen haba ïakren bad ki nongthoh khubor hadien ba bamsmai kum I MLA ba pura ka ïingdorbar Thaw Aiñ ka Jylla.
Haba shim ïa ka jingduna ka jingmihkhmat ki Kynthei ha ïing Dorbar kum kaba sngewsih, kane ka MLA ka East Shillong ila ong “ Ka jingdon ki MLA kynthei kala duna na kaei kaba ngi don ha ka samoi ba la dep. Ngi don saw ngut ha ka samoi ba la dep bad mynta ngi la don biang satang 3 ngut”.
Ila phaikhmat ban ïatreilang bad kine ki arngut ki MLA Kynthei ha ïingdorbar Thaw Aiñ halor ki kam kiba ïadei bad ki Kynthei hapoh ka Jylla.
I Dr Ampareen ila pynpaw ruh ïa ka jingsngewkhia halor ka jingshngaiñ bad ka jingïada ïa ki Kynthei bad ki Khynnah hapoh ka Jylla.
“Ka jingshngaiñ ka dei ka kam kaba baroh ki sngewkhia jur bha ha Jylla. Ngi dei ban pynthikna ba baroh ki Kynthei kin sngew shngaiñ haba ki ïaid ki ïeng ha ki surok” ila ong.
Haba kylli, I Dr Ampareen ila ong “Ka shong ha ka kam ka ban sa bynshet ha nga. Ngam pat tip satia ïa kaei ka kam ban sa bynshet bad ba nga hap leh. Ngin sa peit kumno ka kam ka ïaid bad ngin sa sdang ban trei”.
Haba pynpaw ia kajuh ka jingsngew, I MLA ka Sutnga-Saipung Kong Santa Mary Shylla ila ong ba ki Kynthei kila sdang ban mih shakhmat ban ïashimbynta ha ka kam saiñ pyrthei. “Ngi kyrmen ba ha kine ki san snem ban wan, ngin sa nang ïohi bun ki Kynthei ha ïingdorbar Thaw Aiñ” ila ong haba pynpaw ba ka kam ba hakhmat eh jong I kan ong ban pynshlur ïa ki Kynthei.
Ila pynpaw ruh ba ila buh hakhmat duh ïa ka kam ban pynbha ïa ki surok hapoh ka constituency ba I mihkhmat.

Leave A Reply

Your email address will not be published.