Duh shuki Minister ka PDF, tang ar tylli ïoh ka UDP haduh 8 tylli shim ka NPP ïalade

Shillong, Lber 06 : U National President ka National People’s Party (NPP), Conrad K Sangma ha kane ka sngi Nyngkong u la pynbna ba ka kynhun kaban ïalam ïa ka sorkar kaba thymmai yn tip noh da ka Meghalaya Democratic Alliance -2.0 ha kaba ma u un long u chairman jong ka.
Haba kren bad ki lad pathai khubor, u Conrad u la pyntip ba la dep ruh ban bhah shuki Myntri ïa ki party kiba wan ban synrop lang ha kane ka kynhun. Katkum ka jingong jong u, ka NPP kaba ïalam ïa ka sorkar kan ïoh 8 tylli ki shuki Myntri, nangta ka UDP kan ïoh ar tylli ki shuki Myntri, katba ka BJP bad ka HSPDP pat kin ïoh mar kawei ka shuki Myntri.
Shuh shuh u la pynshai ruh ba ym shym la don na ka PDF kiban ïoh ïa ka shuki Myntri ha kane ka sorkar ba thymmai.
Nalorkata, u Conrad uban sa shimti kum u Myntri Rangbah sa shisien pat u la ong ruh, “Na kine ki 12 tylli ki shuki Myntri, saw tylli kynthup ïa ka shuki Myntri Rangbah kin dei na rilum Garo katba phra tylli pat kin dei na rilum Khasi – Jaiñtia.”
Shuh shuh u la pyntip ruh ba la dep shim ruh ïa ka rai hapoh ka party haba ïadei bad u kyrtong Lamphang bad ruh na bynta ka elekshon jied Lamphang.
“Na ka liang ka NPP ka la dep tyrwa ïa ka kyrteng bad ki la shaniah ruh hanga ban kren ïa kiwei pat ki paralok ha ka kynhun bad hadien ba ngi la ïoh ïa ka jingmynjur, ngin sa pynbna pat ïa ka kyrteng jong u kyrtong na ka bynta katei ka shuki Lamphang,” la bynrap shuh shuh u Conrad.
Lah ban kdew hangne ba kitei ki 12 ngut ki Myntri Sorkar kin shim ïa ka jingsmai ha kane ka sngi Ba-ar ha ryngkat ka jingsakhi lang u Myntri Rangbahduh ka Ri, u Narendra Modi bad ruh u Myntri Kampohiing ka Ri u Amit Shah kaban long ha Raj Bhavan.