Ngin kthong beit ha kine ki san snem ba ki party ba don ha ka sorkar kin pynurlong ïa la ki kular: HYC

Ka ILP, ka shongshngaiñ ha khappud...ym dei shuh ki jingdawa hynrei ki kular, kin hap pynurlong

0

Shillong, Lber 06: U President ka Hynñiewtrep Youths’ Council (HYC) u Bah Robertjune Kharjahrin ha ka sngi Nyngkong u la ong ba ka seng kan kthong ïa baroh ki seng saiñ pyrthei kiba don ha ka sorkar ba kin hap ban pynurlong ïa kiba bun bah ki mat kiba ki la kular sha u paidbah shuwa kane ka elekshon.
Haba kren sha ki lad patahi khubor u Bah Robertjune u la ong ba lada peit na ki manifesto jong ki party ba don ha ka sorkar kiba bun bah ki jingkular kaba ki la khlei sha u paidah bad ong ba na ka liang ka seng kan kthong ïa kine ki party ban dawa ba kin pynurlong ïa ki mat kaba ki la khlei sha u paidbah.
“Lada phi peit ka BJP ka kular ban thung jingtohkit halor ka jingkynnoh bamsap baroh ha ka jylla, la kular ban pynïoh jaka ïa ka ktien Khasi ha ka khyrnit baphra ka ri ba kynthuo naduh ka NPP, BJP, UDP, PDF, HSPDP, phin peit ïa ka jingkular ba kin ai jingshngaiñ ïa ki paidbah ka jylla kiba shong ha ki jaka khappud bad bun bah kiwei ki klar bad ngi kwah ban ong ba kine ki kular kin hap ban pynurlong namar kim dei shuh ki jingdawa ki seng Bhalang hynrei ka kular kaba ki party ki la khlei bad namar ba u paidbah u la pynjop ïa kine ki jingkular kiba phi la khlei ngin kthong beit baroh san snem ban ïai pynkynmaw ïa phi,” u la ong.
“La kular ban ai bording baroh 24 kynta, la kular ban ai jingkyrshan pisa ïa ki nongrep, la kular ban ïarap ïa ki samla bym donkam donjam, la kular ban buh ïa ka tnat pulit ba tang jong ki kynthei bad kiba bun bah ki jingkular, ngi na ka liang ka HYC ngin ym mih ïakhih shuh ban dawa da kiwei ki ar hynrei ba ki kular kiba kine ki party ki khlei kin dei ban pynurlong,” u la bynrap
U la ong ba ka jingleit ka UDP bad PDF ban ïatreilang bad ka NPP kam dei kaei kaei kaba phylla hynrei kum ka seng ka kwah ban tip aiu kin leh na bynta ban pyntreikam ïa ki manifesto kiba ki la khlei kba pher na kawei ka party sha kawei pat.
“Ka UDP, HSPDP, PDF ki la kular ban pynbeit biang ïa ki jingduna kiba don ha ka MoU pynbeit pud ba la soi da ki ar Myntri Rangbah katba ka NPP pat kaba ïalam ïa ka sorkar ka la kam ba kane ka MoU ka dei kaba biang tam bad kaba ym donkam pynkylla eiei bad ngi kwah ban kylli la haba ïadei bad kum kine ki mat kin bat ïa ka jong ka NPP ne ki kular jong kiwei pat ki seng riewlum,” u la ong.
“Phin peit ïa ka UDP, HSPDP, PDF ki kular ban pynbeit ïa ka MoU namar kiba bun ki nongshong shnog ka jylla kim hun katba ka NPP pat ka kam ba kane ka dei kaba biang eh bad haba kumne kine ki seng riewlum kin leh kumno,” u la buh jingkylli.
U la ong ba ka seng ka kwah ba kine ki party bapher bapher kiba ïatreilang kin pynmih ïa ka Common Minimum Program khnang ban u paidbah un tip ïa ka thong kaba ki don na bynta ka jylla.
“Lada kine ki party kim lah ban sei ïa ka Common Minimum Program jong ki ruh ong ïa ngi ba ngin pynkhreh lem da kaba pynhsong nongrim beit thik na ki manifesto jong baroh ki party ba don ha ka sorkar,” ong u Bah Robert.
“La ong ba ki pynbiej man ka san snem bad ngi ki paidbah ruh ngi ngop man ka san snem nga kwah ban ong ba mynta te ngim biej shuh bad kine ki jingpyrshang pynbiej shuwa ban sdang kane ka san snem kin dei da kine hi ki mat ba ngin kthong ïa phi,” u la bynrap.

Leave A Reply

Your email address will not be published.