Shillong, Lber 06 : U National President ka NPP, Conrad K Sangma ha ka sngi Nyngkong u la ong ba ha ki san snem ba ki don lang ha ka sorkar ki la trei kum ka kynhun ryngkat bad ka UDP kumjuh ka PDF bad kumta um sngewdei ban weng ne ïaid lait ïa ki ha kane ka sorkar kaba thymmai.
“Nga ju ngeit barabor ha ka jingïatreilang kum ka kynhun. Watla ha ka por elekshon, ka jingïalap elekshon ka long la ka jong ka jong ne ka jingïa kren ïa kynthoh pyrshah iwei ïa iwei hynrei khatduh hi ka mynsiem jong ka jingïatrei lang kum ka kynhun ka long kaba kongsan,” ong u Conrad haba pynshai halor ka jingtreilang bad ka UDP kumjuh bad ka PDF ha ka sorkar MDA 2.0 ban ïalam biang da ka NPP.
Shuh shuh u la ong ba wat hadien ba ki la ïoh ïa ka jingkyrshan na ki MLA shimet kumjuh na ki MLA ka BJP bad ruh na ka HSPDP ban thaw ïa ka sorkar thymmai hynrei u la kren pat bad ki nongïalam jong ka UDP kumjuh bad ka PDF namar um kwah ban shu ieh ïa ki kumto.
“Nga la ong ïa ki ban donkam ban wan biang kum ka kynhun bad ba kaei kaba la jia ha ka elekshon kadei da kawei pat ka lynnong. Kumta dalade hi nga leit ban kynduh ïa ki nongïalam ka UDP bad PDF bunsien bad kyrpad ïa ki ban ïatrei lang sa shisien pat.Nga la leit sha iingsah jong u President ka UDP Bah Metbah Lyngdoh ban kyrpad ban treilang kumjuh ruh ïa ki nongïalam ka PDF,” la bynrap biang u Conrad.
Shuh shuh u ong ba u kyntu ïa kiwei pat ki seng saiñpyrthei ba ka elekshon ka la kut bad kumta mynta ka la dei pat ka por ban trei katkum ka jingkhmih lynti jong ki paidbah la ka long kum ka liang synshar ne liang pyrshah.
“Kaei ka burom, namar nga kren shai beit ba ngam kwah satia ban shu pyndonkam ne iehnoh ïa ki kumto tang namar ba ngi la biang ka jingbun paid bad ba ngim donkam shuh ïa ki mynta. Dei na kata ka daw ba wat hadien ba ngi la don 32 ngut ruh nga leit ban kynduh ïa ki nongïalam ka UDP bad PDF bad kam dei satia ba ki wan khroh ïanga,” u la ong.
Kumba long mynta hi, kane ka sorkar thymmai ka don haduh 45 ngut ki dkhot, kata 26 ngut na ka NPP, 11 na ka UDP, 2 na ka BJP bad HSPDP bad arngut na ki MLA shimet.
