Ha kajuh ka sngi na ka 30ngut sha ka 27 ngut hiar ki MLA : President UDP
"Ngim shym la leh drama, kata kaba shai"
Shillong, Lber 06 : Ka jingleit jong ka UDP ban ïatrei lang noh bad ka NPP ha kane ka sorkar ba thymmai kadei tang namar ba ka jingïakren ban ïoh ïa ka sorkar ba ïalam da ki party riewlum ka la shu kut noh tang shiteng por, ong u President ka UDP Bah Metbah Lyngdoh.
Haba kren bad ki lad pathai khubor, u Bah Metbah u la ïathuh ba kum ka party ba ïoh 11 ngut ki MLA na rilum Khasi bad Jaintia ki la pyrshang ban thaw ïa ka sorkar ha kato ka sngi ñiew vote hynrei kim shym la ïoh ïa ka jingbun paid. U la ïathuh ruh ba ka jingdon ki MLA na ki party riewlum ka poi tang 19 ngut kumta ki donkam sa ka jingkyrshan na kiwei pat ki party kum ka Congress bad TMC.
Kumta, u la ïathuh ruh ba dei ha ka 03tarik haba ki kynduh ïa ki nongïalam jong kiwei ki party, ha katei ka por ki la ïoh ïa ka jingkhein ba ki don 30 ngut ki MLA ha ka liang jong ki, hynrei kat ban kut ka sngi, ki la duh noh 3ngut ki MLA bad katei ka la pynlong ïa ki ban sahkut tang da ki 27ngut.
“Ha katei ka sngi la kular ïangi da uwei na ki president jong kawei ka party ba ki MLA ba la phet sha kawei pat ka liang (kata ka NPP) kin sa wan phai biang. Ngi la ap hynrei kim shym la wanphai,” la ïathuh shuh shuh u Bah Metbah.
Kumta, u la ong ba hadien ba ki sngewthuh ba kin ym lah satia ban ïoh ïa ka jingbun paid ban thaw sorkar, kumta ki la pdiang noh ïa ka jingtyrwa jong ka NPP ban don noh ha ka sorkar.
“Hadien ba ngi la ïai ap hynrei kam shym la urlong, kumta ngi la shu ïa mynjur noh ban treilang bad ki (NPP).”
Shuh shuh haba pynshai pat halor ki shuki Myntri ne wat haba ïadei bad ka shuki Lamphang, na ka liang u Bah Metbah u la ong ba ka jingïakren mynta ka dang ïaid shakhmat bad sa shipor ar por kin sa lah ban tip.
Ha kawei pat ka liang u la kyntait ïa ka jingkynnoh da u nongïalam ka VPP Bah Ardent M Basaïawmoit ba ka la don ka jingleh drama haba ïadei bad jingthaw sorkar. “Ngam don hangne kum u President ka party ban thaw drama bad ngan ym leh kumta, kata hi kaba shai naka liang jongnga,” u la ong.